Putao, Nhka Ga mare hta dap jung ai Myen hpyen dap ni, majan byin ai lam n nga ai sha, hprawng hting nut mat ai lam, ginra masha ni kaw nna chye lu ai.
Putao, Nhka Ga mare hta dap jung tawn ai Myen hpyen dap hte Pyithutsit ni pawng hpawm nna, nga taw ai dap shara hpe, December 19 ya shani, yawng zep zi tawn kau da nna, wa mat ai nga, dai ginra na mung shawa langai KNG shiga dap de tsun ai re.
“Um 19 ya shani wa mat ai, shanhte lu da ai sau n-gu yawng dut kau da ai, hpa n ngam da ma ai, shanglawt ni htim gasat wa na hpe tsang ai majaw, tau hkrau na yen mat ai masa re ga rai nga ai,” nga tsun dan ai re.
KIA dap ni kaw na Nhka Ga Myen hpyen dap hpe htim gasat wa na shiga lu ai majaw, hprawng hting nut mat ai masa re lam ginra masha ni tsun maram da ai re.
Nhka ga mare hta, lai wa sai 10 ning daram hta, Myen hpyen dap hte KIA dap majan laja lana gap gasat hkat ai hpang, wa du dap jung ai shara re lam chye lu ai.
Nhka ga mare gaw, Putao Machyang Baw Mali hka kaw nna, hka nam de hkying hkum mi daram yu wa yang du ai mare kahtawng re lam chye lu ai.
Dai sha n ga, Jinghpaw Mung hte Sam mung jarit, Man Win Gyi mare hta dap jung tawn ai Myen hpyen dap shara n kau hprawng hting nut mat ai lam nga ai hpe chye lu ai.
Myen hpyen dap gaw mungdan ting madang hta majan sum machyi ai lam ni ding yang byin nga ai majaw, dap shara kaji law law hpe hprawng hting nut tau kau da ra taw ai re.
Ndai December shata praw hta sha, Njang Yang ginra hta dap jung tawn ai Myen hpyen dap yawng hpe Myitkyina de shaga la kau ai lam mung nga wa sai re.
