Waimaw ginwang kata hta, Mam dan shu la na matu bungli galaw masha taw ai mayak a majaw, hkauna Mam ni krawp min lai ma wa taw ai nga, hkauna galaw mung shawa ni kaw na chye lu ai.
Hkauhting hkauna galaw ai ginra masha ni gaw, ya ten hkauna pa hta mam myin taw sai rai tim, bungli galaw masha taw nga ai hte, Mam sharun jak ni mung shawoi shaning na zawn nshang mat ai majaw, jak shap manu shawoi shaning hkan na hta, htam lahkawng ram manu tsaw rawt mat ai majaw, yak hkak taw ai lam, KNG de ndai zawn tsun dan wa ai re.
“Lai wa sai shaning hkan gaw lawu ga de na ni hpe sha jai lang ai rai nga ai, lawu ga de na ni gaw lawan ma lawan ai, dai ning shan hte n du wa ai re nga yang gaw yak sai gaw, bungli galaw masha n lu ai re nga yang gaw, jak langai lahkawng sha nga ai hpe kashun shap, manu gaw shawoi na hta htam lahkawng jan rawt mat, gara hku dan dup la na pyi n chye sai,” nga tsun dan wa ai re.
Shawoi shaning hkan Mam dan manu marai langai mi hta mun mi grup yin sha jaw ra ai raitim ya ten marai langai mi Mun mi hkying manga kaw n-na Mun lahkawng hking manga daram du hkra manu jaw ra ai hpe ginra masha ni tsun dan ai re.
Ya ten Waimaw ginra ting rai yang mam sharun jak 5 ram sha nga ai rai n-na gashun gashe shap lang ra taw ai majaw Mam myin lai krawp mat na hpe myit tsang taw nga ma ai re.
Lai wa sai shaning ni hta bungli galaw masha grai law ai rai tim, dai ning gaw majan masa lam hte hpyen lahkawn ai lam ni a majaw, gadai mung n gwi sa galaw mat ai masa re lam ginra masha ni tsun ai re.
Mare hte ni ai hkauna pa hkan na, dan dup la lu ai rai tim, mare hte tsan ai Nang Zaw, Gardu, Nawng Yan, Mai bawng, Nawng Hkyi mare hkan na ni hpe gaw grai n lu dan dup la shi ai lam chye lu ai re.