Hpunpyen Bum Myen hpyen dap kaw nna gap dat ai laknak kaba si lahkawng, Miwa hkran maga de wa hkrat ai hpe chye lu ai.
December praw 6, jahpawt manap hkying 10 daram hta, Hpun pyen bum Myen hpyen dap kaw na, Laiza maga de gap bun ai hta, Miwa hkran maga de laknak kaba si lahkawng lang wa hkrat ai nga, Laiza ginra masha langai KNG de tsun ai re.
“Miwa hkran maga de wa hkrat ai teng ai, Senke Mawdaw kashin seng makau kaw re, masha si hkala ai chyawm hpa n nga ai,” nga tsun dan ai re.
Lai wa sai November praw 4 ya shani hta mung, Hpunpyen bum kaw na gap bun ai laknak kaba si Miwa hkran maga de wa hkrat ai majaw, Miwa La marai 1 si nna, marai 2 hkala sawng wa ai re lam chye lu ai.
November 30 ya shana hta mung, Hkaya Bum hte Hpunpyen bum hta dung ai Myen hpyen dap ni kaw na, Laiza, Namsan yang makau grup yin de laknak kaba 20 lang jan gap bun wa ai re.
Laiza makau grup yin hta dung ai Myen hpyen dap ni kaw na laknak kaba jahkring hkring gap shadam bun nga ai majaw, Laiza ginra masha n kau tinang chye ai shara ni de hprawng yen taw nga ai re.
