Myen hpyen dap laknak kaba gap shadam bun ai majaw, Monyin Dakkasu jawng makau hta lam hkawm nga ai Kanu num hte kasha marai lahkawng hta, asak 6 ning re ma kaji langai asak si sum nna, kaga ma kaji langai hte Kanu ngu na wa gaw, hkala hkrum wa ai lam, ginra masha ni kaw na chye lu ai.
December praw 6 ya jahpawt hkying 8 daram hta, Monyin dakkasu jawng makau hta, nta masha nawng lam hkawm taw nga ai ten, laknak kaba si wa hkrat hkra ai majaw, si hkala hkrum wa ai re lam Karum kahtau hpung na lit nga ai ni KNG shiga dap de tsun dan ai re.
“Ma kaji langai dai shara kaw nan kalang ta si mat ai, laga langai mung masa n kaja ai tsawm ra hkala sawng ai, Kanu ngu na wa chyawm grai wa n sawng ai, ya Monyin tsirung kaw re,” nga tsun dan ai re.
Laknak kaba si wa hkrat ai, Htan Tapin mare maga de KIA PDF dap ni nga ai ngu n tsen nhten ai hte Myen hpyen dap ni laknak kaba jahkring hkring gap bun ai shara rai nna, dai hpawt gap dat ai mung, Monyin mare shinggan na Myen hpyen myawk dap na gap bun ai re nga ginra masha ni matut tsun ai re.
Monyin PDF dap maga de na gaw, dai hpawt manap kapaw la ai gaw, Dakkasu jawng makau hta Myen hpyen dap hkam da ai Bawm kabye kapaw la na, si hkala hkrum wa ai re nga, ndau da ai re.
December praw 5 ya jahpawt jau Monyin hte Nawnglut de sa ai lam lapran na Myen hpyen dap shara langai hpe KIA PDF pawng hpawm dap ni htim gasat zing kau ai re.
Ya ten dai ginra makau grup yin hta hpyen masa matut shaja hkat taw nga nna, laknak kaba gap shadam bun ai lam ni mung naw nga taw ai lam chye lu ai.
