Jinghpaw-Sagaing jarit, Htichyaik muklum hpe KIA woi awn ai hta PDF pawng hpawm dap ni htim shagrawt majan masing baw taw nga ai shata mi daram na wa ai ten, Myen hpyen dap maga na mung muklum ntat sum hkra nbungli hte htim gasat makawp maga nga ai re.
November praw 6 ya shani Kawlin hpe htim gasat zing madu kau ai hpang Hti Chyik hpe November praw 10 ya shani kaw nna htim gasat hpang wa ai rai nga ai.
Htichyik hpe htim gasat ai hta, majan laja lana bat lahkawng daram byin ngut ai hpang, PDF pawng hpawm dap maga, majan hpe jahkring gan jahkring da nna, ya ten matut manoi bai gap gasat taw nga ai re.
Ya ten Htichyaik ginra hta, shani shagu nbungli hte wa gap taw nga nna,, majan hkring dat, bai gap dat rai shani shagu majan byin nga nna, PDF dap maga na si hkala ai lam ni mung nga taw ai hpe chye lu ai.
Myen hpyen dap ni ya ten, Htichyik Myatheintan bum hta kring mading rai dap jung nga shara jahkrat da nna ninghkap majan hku na sha dung nga sai lam chye lu ai.
Shata mi daram na wa ai Htichyik mare kaba htim shagrawt majan hta, ya ten PDF dap maga de na, mare ka ang hkup jan daram hpe up madu da lu sai rai tim, Myen hpyen dap maga de na laknak kaba nbungli ni hte wa gap ai majaw, mare wan hkru hten ai lam ni shani shagu matut byin nga ai lam chye lu ai.
