Pyithusit Dap Gap Dat ai Laknak Kaba Si Majaw, Waimaw Ginra Masha Langai Asak Si Sum
Waimaw, Awngmyay thit mare hta U Shwe Min woi awn ai Pyithutsit hpung ni gap dat ai laknak kaba si a majaw, Lisu kawa la langai asak si sum wa ai lam chye lu ai.
December praw 5 ya jahpawt jau, hkying 4 daram aten KIA Dung 3 wuhpung ni lam lai wa let, Nlung Hka hta dap jung nga ai Shwe Min Pyithutsit hpung ni hpe sa gap kau da ai hpang, laknak kaba hte bai n htang gap bun ai hta ya na zawn mung shawa langai asak si sum wa ai nga, dai ginra na mung shawa langai KNG shiga dap de tsun dan wa ai re.
“Mani hpawt jau hkying 4 daram hta sinat kaji ngoi ai nsen shawng na ai rai tim, laknak kaba nsen gaw grai n na shi ai, dai hpang hkying 6 htu wa yang, Nlung hka hta dung ai Pyithutsit dap ni gara de gap mayu ai kun? dai kaw na gap dat ai laknak kaba si mare kata wa hkrat ai, dai kaw nga dumsu sat hkyen taw nga ai Lisu la langai laknak kaba si wa hkra na dai kaw nan si mat ai, nga tsun dan ai re.
Pyithutsit ni gap dat ai laknak kaba si Lisu amyu sha ni nga law ai lawk hta wa hkrat ang ai rai nna, dai asak si sum ai wa mung, Lisu amyu sha, asak 40 ning daram re Slg Lazaru mying ai wa re lam chye lu ai.
U Shwe Min Pyithutsit dap gaw, Myitkyina Manmaw lam kaba, Aung Mye Thit mare hta dap jung shara jahkrat da nna, lai sa lai wa mung mare masha ni kaw na gumhpraw hta sha taw ai zawn, hkrun lam hkawm mung shawa ni hpe mung san jep taw nga ai re.
U Shwe Min Pyithutsit dap ni kaw lai wa sai November shata praw hta, Lisu nta langai na hpyen la marai langai n galaw n mai, laja lana hpyen hkan lahkawn taw nga ai re.
