Mandalay-Manmaw lam kaba hte Manmaw Myitkyina lam kaba ni yawng pat mat ai majaw, Manmaw mare kaba de gun rai n shang mat ai hpang, Jak sau dumhprut taw wa nga ai sha n ga, kaga gunrai manu ni mung grau grau tsaw rawt taw nga ai re.
Dai mawdaw lam kaba lahkawng yan hpe lai wa sai November praw kaw nna, hpyen majan ni a majaw pat kau da ai re.
“Ndai kaw sau seng kaba ni ding yang n hpaw ai, aten hte aten sha hpaw ai, jahpawt hkying 8 na hkying 10, shana maga hkying 3 na hkying 4, sha hpaw ai, sau seng kaba hta liter mi 3800 sha rai tim, laga pung hte hteng dut ai shinggan seng hkan 7000 jaw nna, mari lang ra ai.” nga nna, Manmaw ginra, mung shawa langai KNG de tsun ai re.
Lam pat da ai raitim, gunrai n dum hprut mat hkra gunrai htaw mawdaw n kau shang ai rai tim aten na wa ai hte rau ya na zawn gunrai dum hprut wa taw nga ai re lam, matut tsun ai.
Manmaw mare kaba hta, ya ten jak sau seng law malawng pat da nna, n kau hpaw ai shara ni hta mung, shadawn shangdang hte sha dut ya taw ai lam chye lu ai.
Jak sau wang lu wang lang n lu mari ai majaw, ginra masha ni hkawm sa hkawm wa yak hkak ai sha n ga, hkau na galau jak ni hta mung jak sau n lu mari bang ai majaw, galaw lu galaw sha lam hta mung yak hkak wa taw nga ai lam tsun ai re.
Manmaw mare kaba hta majan byin ai lam n nga ai rai tim, laknak kaba n sen shana shagu na lu taw nga ai lam chye lu ai.
