Katha Palwi Shwe mare de htu shadut shang wa ai Myen hpyen la marai 3 gaw, Wunpawng Mungdan Shanglawt hpyen dap KIA de laknak jahkrat nna shang wa ai ai lam, Katha PDF dap ni kaw nna chye lu ai.
December praw 3 ya jahpawt hkying 6 daram hta, Katha Palwi Shwe mare de, jak li langai hte htu shadut shang wa ai Myen hpyen dap hpe KIA hte PDF pawng hpawm dap ni laknak kaba hte hkap gap ai hta, yawng dumbri dum bra hprawng ayai mat nna, marai masum gaw, laknak jahkrat nna, shang wa ai lam, Katha PDF lit nga ai salang langai KNG hpe tsun ai re.
“Jakli langai hte anhte nga ai maga de sa wa ai, dai hpe laknak kaba hkap gap bun ai hta, sum machyi law nna, dum bri dum bra hprawng ayai mat ai, dai kaw na marai 3 shang wa ai ga rai nga ai” nga tsun dan ai re.
Laknak kaba hte hkap gap ai hta si hkala sum machyi ai marai 15 daram nga wa nna, law malawng gaw, jakli hte bai hprawng lawt mat ai re lam chye lu ai.
Dai hkap shingla gasat hkrum ai jakli gaw, shani ka-ang ten hta machyi masha ni hpe htaw nna, Katha de bai htaw n htang mat ai re.
Ya hkap shingla gasat ai Palwi Shwe mare gaw, KIA Dung 1 ginra hte, Dung 12 ginra hte matut ai shara re lam matut chye lu ai.
Ya ten Myen hpyen dap kata hpyen la n nga mat ai majaw, lam amyu myu hku nna, hpyen lahkawn taw nga ai hte dap kata na hprawng mat ai ni, ahkang lai nna, n sa mat ai ni yawng hpe mung bai shaga gahkyin taw nga ai re.