Mungmyit Sinli ginra hta KIO magam gun salang kaba lahkawng hpe Kokang dap ni adup abyen zingri nna, bai dat dat ya ai lam byin wa sai re.
Lai wa sai November 27 ya shani, Bang Hung Ginwang daw, Gangming Loidau Ginwang Uphkang Rung de Equitment hte sau pung wa sa na matu lung wa ai shaloi, Nam jarap mare Asia World makau kaw sin nga ai Kokang MNDAA dap ni hkap rim nna, adup gayet zingri na bai dat dat ai nga, Loidau Ginwang, kaw na shapraw da ai laika kaw na chye lu ai.
A dup gayet zingri hkrum ai salang kaba lahkawng gaw, Salangkaba Zahkung Lum Ze, ( Bang Ja Ninghtawn amu madu), Salang Kaba Byawa Hkawng Ze ( Banghkam Ninghtawn Du ) yan re lam chye lu ai.
Salang Kaba Byawa Hkawng Ze gaw hkra maga Myi ga mat ai rai nna, Salang Kaba Lum Ze gaw la pai maga lata daw mat nna, shan yen lahkawng kaw lawm ai Equitment 10 , sau pung 15, gumhpraw sen 40, Phone lahkawng hpe zing la kau ai lam chye lu ai.
Ndai lam hte seng nna, Loidau Ginwang, kaw na seng ang ai ginjaw de tang madun da ai rai nna, gara hku hparan na ngu ai lam hpe, mung shawa ni myit shang sha nga ai re.
