Pangsai mare hta, Kokang MNDAA dap ni gaw Mung shawa yawng hpe zuphpawng shaga la nna, hpyen masa lam, ginra masa lam hte, hpaji jawng hpaw wa na masa lam ni hte seng nna, zup hpawng woi galaw wa ai lam, ginra masha ni kaw na chye lu ai.
November 20 ya shani Pang Sai ginra hpe Kokang dap ni yawng zing madu la kau ngut ai hpang, hpyen yen mung shawa ni yawg tinang mare buga dum nta mai wa sai lam hte shawng lam mung masa lam hte nna, tsun dan mat wa ai nga, dai ginra na mung shawa ni KNG shiga dap de tsun dan ai re.
“Pang Sai ginra yawng hta Myen hpyen hpung ni n nga sai majaw, hpyen yen mung shawa yawng tinang mare buga dum nta wa nga mai sai, shana shinggan pru hkawm ai lam ni n galaw na matu tsun ai, Myen hpyen dap n pu rung magam bungli galaw ai ni hte, Pyithutsit hpyen la galaw ai ni yawng, Kokang dap de laknak, magam bungli yawng ap na shang wa mai ai lam ni hpe tsun ai,” nga tsun dan ai re.
Majan n hpan lapran rai n kapaw mat shi ai, laknak kaba hte Bawm ni hpe mu yawng mung, seng ang ai ni de tsun shana na matu matut htet shana wa ai re.
Pang Sai mare kaba hpe Kokang dap maga de na, lai wa sai November 20 ya shani tsep kawp htim gasat zing madu kau sai hte, Pang Sai Wandin jarit lapran kaw, Kokang dawng hkawng sharawt da sai re.
Ya ten Kokang dap maga de na, Munggu Hpawng Seng hte Pang Sai, Chin Shwe Haw shara ni hta uphkang hkrang ni yawng hte a tsawm hkrak nga taw sai lam chye lu ai.
1027 majan masing hpaw wa ai dai ni shata mi hpring sai rai nna, matut na tim majan masing hpe grau shatsaw wa na hte mungdan ting madang hta shang lawm mat wa na re lam, Kokang dap maga na tsun da ai re.
