Laiza makau, Laja Yang mare hta, Myen hpyen dap n gun gahkyin wa ai hpe, KIA dap kaw nna, Drone hte sa htim gap ai hta, Myen hpyen dap sum machyi hkrum ai lam hpyen shiga ni kaw nna chye lu ai.
November 27 ya jahpawt hkying 9 aten dai ginra hta rawng nga ai Myen hpyen hpung ni Laja yang mahkrai pawt de majaw wa ai majaw, KIA dap maga Drone hte Bawm mali, manga lang sa jahkrat bun ai hta, hkra machyi ai lam nga wa ai nga, KIA shawng lam magam gun ni KNG shiga dap de tsun dan ai re.
“Dai makau mayan hta nga ai Myen hpyen la ni mahkawng wa ai, Laja Yang mahkrai pawt de, dai hpe anhte maga Drone hte mali manga lang sa gap ai, dai kaw sum machyi sam ai, laknak kaba 20 lang daram bai gap bun wa ai,” nga tsun dan ai re.
Dai zawn Myen hpyen dap maga sum machyi ai lam nga wa ai majaw, Hkaya Bum hte Bumre bum hta dap jung ai Myen hpyen dap ni Maisak Pa, Munglai Hkyet, Namsan Yang maga ni de laknak kaba 20 lang jan gap bun wa ai re hpe chye lu ai.
Ya ten dai ginra hta Myen hpyen dap hte KIA dap lapran hpyen masa ding yang shaja hkat taw nga ai re.