Mungmyit Sinli, 105 Mile hte Namtau mare lapran na Lung Hkang Bum hpe Kokang dap maga zing madu kau lu sai lam chye lu ai.
Dai dap shara hpe November 25 ya shani sa htim gap gasat wa ai gaw, November 26 ya shana maga de zep zi zing madu kau sai lam, Kokang dap ndau da ai sha n ga, ginra masha langai mung n dai zawn tsun dan ai re.
“Mana maga de Lung Hkang bum hpe zing kau sai nga tsun ai, ya an hte ning lahta daw de gaw, Kokang dap ni hkrai rai sai, ya mung 105 Mile de htu shadut htim gasat taw nga ai, laknak kaba ni ding yang ngwi nga ai,” nga tsun dan ai re.
Lunghkang bum gaw, Muse mare kaba hte deng 6 daram sha tsan ai shara rai nna, dai dap shara gaw, madung Mungbaw ginra hte Muse ginra lapran na ahkyak ai dap shara re lam chye lu ai.
Htim gasat zing madu kau sai Lunghkang Bum mayan de November 26 ya shana Myen hpyen dap nbungli hte wa gap ai majaw, asak 20 ning daram re ramma la kasha langai si nna, laga mung mare masha nkau hkala hkrum wa ai lam chye lu ai.
Ya ten 105 Mile Myen hpyen dap hpe, dingdung daw dap hpawm hpung ni maga matut htim gasat taw nga ai re.
