KIO Asuya Ulang Pa Ginwang, Prang Ninghtawn kata na, Kadaw Nhkang Kawng Myen hpyen dap hpe October 24 ya jahpawt htim gasat zing kau lu sai lam, KIA shawng lam hpyen shi sawk ni kaw na chye lu ai.
Kadaw Nhkang Kawng Myen hpyen dap hpe KIA Dung 27, Dung 1, hte Ulang Pa ginwang mung shawa hpyen hpung ni pawng hpawm nna, sa htim gap gasat ai hta, hkying 10 chyen daram aten hta tsep kawp yawng htim gasat zing la lu sai nga, shawng lam magam gun ni KNG shiga dap de tsun dan ai re.
“Um teng ai, hkying 10 chyen daram kaw lu zing sai nga tsun ai. dai shara gaw ni byuha (နည်းဗျူဟာ) kawng re ga rai nga ai. dai kaw maram yu yang hpyen n-gun (300) daram gaw nga na re ngu maram lu ai.” nga tsun dan ai re.
Gasat zing la lu ai hpyendap gaw, Nmau hka sinna dingdung maga, Jinghpaw Mung hte Sammung lapran na, hpyen masa lam hta ahkyak dik ai shara re lam chye lu ai.
Ya na zawn sa htim gap gasat zing kau ai hta, Myen hpyen dap maga, sinat laknak machyu pala alaw alam padang dip zing la lu ai lam chye ai rai tim, lahkawng maga si hkala sum machyi lam hpe gaw a tsawm tup hkrak n chye lu ai re.
Ndai laman Myen hpyen dap shara nkau hpe KIA dap maga hkan htim gap gasat zing taw nga ai re.