Hpakant, Tharmahkan mare hta dung ai Myen hpyen dap gap dat ai laknak kaba si majaw, asak 13 ning ma langai laknak kaba hkra nna, asak si sum wa ai lam, ginra masha ni kaw nna chye lu ai.
October 18 ya shana maga hkying 5 aten, Tarmahkan Myen hpyen dap Hk.M.Y 119 dap ni gaw, KIA dap ni nga ai shara ngu maram lu ai de, laknak kaba 3 lang gap bun dat ai majaw, Nat Hkahtung (နတ်ရေတွင်း) lawk hta laknak kaba wa hkrat ai majaw, asak 13 ning re ma langai si sum wa ai nga, dai ginra na mung mare masha langai KNG shiga dap de tsun dan ai re.
“Si mat ai Ma gaw tsawm ra sawng mat ai, hpa na dai hku gap ai kun n chye ai, hpa majan mung n nga ai, shan hte gaw KIA nga ai maga de gap ai gaw she n nga i? mung shawa ni nga ai mare lawk kaw wa hkrat ai majaw, Ma langai hkra ai, tsi rung de htaw sa yang lam kaw sha asak n rawng mat ai,” nga tsun dan ai re.
Laknak kaba hkyep hkra nna, hkala sawng ai majaw, tsi rung de htaw lagat sa ai ten, dai lam lapran kaw sha si mat ai lam chye lu ai.
Ya ten dai ginra hta majan byin ai lam hpa n nga ai raitim, Myen hpyen dap maga dai zawn laknak kaba gap shadam bun taw nga ai re lam, chye lu ai.
Ndai laman Myen hpyen dap hte KIA dap ni Hpakant ginra hta hpyen masa ding yang shaja hkat taw nga ai rai nna, October 16 ya shana maga KIA Dapba 9 hte ANang Pa hpe Myen hpyen dap nbungli hte laknak kaba sa gap bun kau da ai re.