Manmaw, Nyaung Pin lawk hta nga ai, Salang kaba Dashi La Doi a dum nta hpe Myen Hpyen dap ni October 17 ya shana sa shang rim ai hta, nta masha marai 3 hte jinghku ma marai 1, yawng marai 4 hpe rim woi mat nna, nta hpe gaw bawm kapaw jahten kau da ai lam chye lu ai.
Manmaw Myen Hpyen dap Ts.K.Hk (21) dap na Myen hpyenla hte Balik ni pawng hpawm nna, October 17 ya shana dai zawn sa galaw kau da ai re nga nna, ginra mung mare masha langai KNG shiga dap hpe tsun dan ai re.
“nta masha marai 3 hte dai kaw sa manam ai jinghku kasha langai mung rim hkrum mat ai, masha rim mat ai sha n ga, nta hpe mung yawng kapaw jahten kau da ma ai,” nga nna tsun dan ai re.
Ya ten dai bawm kapaw jahten kau ya ai Salang Dashi La Doi a nta makau grup yin hku kadai mung n mai sa hkawm ai rai nna, Myen hpyen dap maga sin yu taw ai nga, ginra masha ni matut tsun dan ai re.
Manmaw mare hta, Namsan majan a matu, hka sanghpawli kaba hte hpyen laknak arung arai hte malu masha wa htaw sa ngut ai hpang kaw nna, Myen hpyendap maga laja lana san jep ai lam ni, ding yang galaw nga ai re.
Namsan de majan byin wa ai hpang, Manmaw kata masha pru shang lam ni hpe san jep ai lam ding yang galaw nga nna, KIA,PDF hte matut mahkai nga ai ngu n tsen n hten ai mung mare masha ni hpe hkan jep sagawn ai lam ni ding yang galaw wa taw nga ai re.
Myen hpyen dap daru magam zing kau ai hpang, Myen hpyen dap n pu, makan dap rung nkau jahkring hkring gap gasat hkrum taw nga ai re.
