Sengtawng mare hta October praw 3 ya shani Myen hpyendap gasat hkrum nna, mawdaw 2 hte, laknak machyu pala n kau hpe padang dip zing la lu ai lam, KIA hte ni nawn ai ni kaw na chye lu ai.
Dai jahpawt hkying 10 daram aten, mung shawa mawdaw masum hte hkawm sa wa ai Myen hpyen hpung ni hpe, KIA hte PDF dap ni bawm hte hkap gasat ai kaw nna majan byin wa ai lam chye lu ai.
“Mawshan kaw nga taw ai PDF ni hpe sa wang gap gasat na matu sa wa ai kaw, anhte maga na shawng gap gasat dat ai kaw, Myen hpyen dap maga sum machyi ai lam nga wa ai rai nga ai,” nga shawng lam magam gun langai KNG hpe tsun dan ai re.
Dai hpang shani ga-ang hkying 12 kaw nna hkying 3 daram aten du hkra majan byin wa nna, shana maga de Myen hpyen mawdaw hpe bai sa zing la ai ten mung gap gasat hkat wa ai lam nga ai lam, dai ginra na mung shawa ni matut tsun dan wa ai re.
Myen hpyendap maga sum machyi ai lam law ai majaw, laknak kaba gap shadam bun ai ten, mung shawa n ta kau hkrun hten ai lam ni mung nga wa ai hpe chye lu ai.
Myen hpyendap gaw Sengtawng mare makau grup yin hpyen n gun kaba jahkrat da ai hte hpyen shamu shamawt nga nna, lai sa lai wa mung mare masha ni hpe mung san jep taw nga ai lam chye lu ai.
Matut na rai tim, Myitkyina Manmaw lam kaba n tsa, Nmawk kaw na, Myen hpyen n gun tsa lam, mawdaw lam kaba hku na lagaw lam hte Num Lang maga de lai lung wa taw nga ai lam chye lu ai.