Mogaung mare kata, Myen hpyen dap n tsen n hten ai majaw rim woi da ai mung shawa marai 200 hkawt du sai rai nna, san jep ai hta zingri sat hkrum ai marai 4 nga sai lam, ginra masha ni kaw na chye lu ai.
Myen hpyen dap gaw, lai wa sai August shata kaw na, Mogaung muklum kata nga ai mung mare masha ni hpe, PDF dap ni hte matut mahkai ai ngu n tsen n hten ai hte hkan rim hkawm taw nga ai gaw, dai ni ten masha marai 200 hkawt hpe rim da sai lam chye lu ai.
Dai zawn hkan rim ai hta, n tsen n hten ai ni hpe a dup abyen zing ri nna, san jep ai hta lata shalai na zingri sat kau ai marai 4 du sai lam dai ginra na mung shawa langai KNG shiga dap de n dai zawn tsun dan ai re.
“Lawt wa ai ni tsun ai gaw marai 200 daram du sai nga tsun ai. lawt wa ai ni nga ai zawn, tara jewat hkrum ai ni mung law sai, rim da ai law malawng gaw gat dut ai ni re, dai kaw san jep ai hta adup abyen zingri na lata shalai kau ai marai 4 rai sai, yawng chye ai Wabaw Tang Gun, hte Zinyaw sau seng madu, dai kaw la marai 2 naw lawm ai, mying a tsawm tup hkrak n chye ai, Mogaung na sha re, yawng rai yang 4 rai sai.” nga tsun dan ai re.
Myen hpyen dap ni rim zingri sat kau ai ni gaw, Slg Wabaw Tang Gun, Zinyaw sau seng madu Hkin Ma Shwe, hte dai Momaung na La marai 2 rai nna, ya hpang e bai zingri sat kau ai yan a mying hpe a tsawm tup hkrak n chye lu ai rai nna, moi mang hpe mung n jaw ai re lam chye lu ai.
Mogaung muklum kata Myen hpyen dap ni kaw na dai zawn hkan rim shatsang hkawm ai majaw, mung shawa ni galaw lu galaw sha lam ni hta yak hkak dut dang ai lam law wa ai hpe chye lu ai.
Dai zawn Myen hpyen dap ni rim woi da ai kaw na, gumhpraw jaw na bai lawt wa ai marai 30 nga sai hpe mung matut chye lu ai.
Mogaung muklum kata lai wa sai August 19 ya shani jawng ma sa tau ai Myen hpyen mawdaw gap hkrum ai kaw na ya na zawn, laja lana rim jep ai lam ni galaw wa ai rai nga ai.
