Myitkyina Myen hpyen n bungli pa hpe, PDF wuhpung langai mi laknak kaba hte sa gap bun ai lam chye lu ai.
September 24 ya jahpawt hkying 8 daram aten, laknak kaba 107 mm, 90 mm ni hte sa gap bun ai hta, Myen hpyen n bungli lahkawng hkru hten mat ai lam rawt malan dap maga de na tsun ai re.
“F-7 Nbung li lahkawng hten mat ai nga na gaw tsun ai, gade daram gara hku hkru hten ai hpe a tsawm n chye ai rai tim, ram ram gaw hten ai nga ntsa salang ni tsun ai, anhte kata shiga hku na mung chye lu ai. dai n bungli ni gaw gau sharin ai baw, shim lam gawan hkawm ya ai baw ni hta lang ai baw n bung li re.” nga nna dingdung daw rawt malan hpung zinghkri (NBPDF) na lit nga ai langai KNG de tsun dan ai re.
Dai hkru hten mat ai n bung li hpan gaw, F-7 baw hpan rai nna, madung gau sharin ai hta jai lang ai n bungli hpan re lam chye lu ai.
Myitkyina Myen hpyen n bungli pa sa gap ai hta, n bungli 2 hten mat ai sha n ga, n bung dap hte matut mahkai shadaw, nbungli jak gram ai n ta hte, nbungli dap magam gun ni nga ai n ta ni, hkra hten ai nga, NBPDF dap maga n dau da ai re.
Ndai kalang sa gap ai hta, n htoi bat mi daram tau hkrau hkyen lajang shaji ai re majaw, tang du ai lam nga ai re lam, rawt malan hpung ni maga matut tsun da ai re.
Dai zawn Myen hpyen n bungli pa gap hkrum ai hpang kaw na, Myitkyina pru shang lam ni yawng hta Myen hpyen dap laja lana san jep ai lam ni galaw nga nna, Mali hka maga de mung, jakli kaji ni hte dap shing grup gayin hkawm ai lam ni galaw nga ai lam chye lu ai.
Myitkyina Nbung li dap hpe sa gap jahten ai lam teng ai rai tim, gade daram gara hku hten ai ngu hpe chyawm a tsawm tup hkrak n chye ai nga, n bungli pa makau nga ai mung shawa ni matut tsun ai re.
Lai wa sai 2021 ning hta mung Myen hpyen n bungli pa hpe KIA dap maga sa gap gasat wa yu sai lam chye lu ai.