Namhpakka mare hta Myen hpyendap hte Balawng dap TNLA ni hpyen masa shaja hkat taw nga ai majaw, ginra masha ni myit tsang nga ma ai re.
September praw 6 ya shana maga hkying 3 daram aten, Namhpakka Myen hpyen dap hpe Balawng TNLA dap ni laknak kaba 3 sa gap bun ai hta, Myen hpyen Du jan hte kasha hkala hkrum ai nga, dai ginra na mung shawa ni KNG shiga dap de tsun dan ai re.
“Mana maga Balawng ni sa gap ai kaw Dap up Dukaba na madu jan hte kasha yan hkala ai nga na tsun ai, dai hpang kaw na Myen hpyen dap ni shana tup laknak kaba gap shadam ai, anhte Jinghpaw lawk de chyawm n re, Balawng nga ai maga de law malawng shading ai ga rai nga ai.” nga tsun dan ai re.
Dai ginra hta Balawng TNLA dap ni kaw nna, mung mare masha ni hpe jahkring gan hprawng yen na matu tsun wa ai lam nga ai majaw, ginra masha ni myit tsang nga ma ai re.
Ya ten Myen hpyen dap ni hpyen hpung 3 daram garan nna, mare makau grup yin ni hta hpyen shamu shamawt hkawm nga ai rai nna, Balawng TNLA dap ni hte hpyen masa shaja hkat taw nga ai lam chye lu ai.
Dai zawn Balawng dap ni mare kata htu shadut shang wa ai majaw, majan laja wa na hpe ginra masha ni myit tsang taw ai lam n dai zawn matut tsun ai re.
“ya ten gara kaw mung hprawng na shara n nga ai, gara shara mung shim lam n nga ai, majan byin wa yang mai byin ai hku tinang n ta wang kaw kaduk htu na sha gawp makoi na shalai taw ai, lama Balawng ni shang wa nna, majan byin wa ai rai yang anhte mung shawa ni grai jam jau wa na masa nga ai.” nga tsun ai re.
Ya ten Namhpakka makau grup yin hta Myen hpyen dap hte Blawng TNLA dap ni jahkring hkring gap gasat ai lam ni byin nga nna, Namhpakka Myen hpyen dap Hk.L.Y (123) dap na laknak kaba gap shadam bun ai majaw, mung mare masha si hkala hkrum wa sai re.
