Namting kaw nna Hpakant de lung wa ai Myen hpyen hpung hpe KIA Dung 6 bawm hte hkap shing la gasat ai hta, Myen hpyen dap maga si hkala lam law ai hpe chye lu ai.
Dai Myen hpyen hpung ni gaw, August 27 ya shani Namya mare kaw na mung shawa ni hpe hpyen ninggang shatai let lai lung wa ai rai nna, Namting mare mare hta August 28 ya shani du shang wa ai re lam chye lu ai.
Dai zawn Namting mare kaw na Hpakant maga de August 29 ya jahpawt lung wa ai ten, KIA Dung 6 ni kaw na, Namting mare lai hta bawm 5 lang hte hkap shing la gasat ai kaw, Myen hpyen dap maga marai 6 si nna, marai 10 jan hkala hkrum wa ai lam shawng lam hpyen shi sawk ni shana la ai kaw na chye lu ai.
“Bawm hkap kapaw ai shara gaw, Namting mare hte taw tap sha rai nga ai, san yu yang dai bawm hkap kapaw ai kaw marai 6 si taw nna, marai 10 jan hkala ai nga tsun ai. dai kaw hkap shingla gasat hkrum ai majaw, Namting de bai n htang mat ai.” nga tsun dan ai re.
Hpyen n – gun 100 daram lawm ai dai hpyen hpung ni gaw, ya ten Namting mare de bai hting nut mat ai rai tim, hpyen masa matut shaja hkat taw nga ding yang re lam chye lu ai.
Myen hpyen dap ni Namting mare lahta hta hkap shingla gaat hkrum ai majaw, ya ten Hpakant lam hkawm sa hkawm wa lam hpe myen hpyen dap maga jahkring bai gan pat da ai lam chye lu ai.
Namya mare kaw na rim woi mat ai Mung mare masha marai 14 hpe Namting mare du ai hpang, yawng hpe bai dat dat ya sai re lam chye lu ai.
Namya mare kaw na rim woi mat ai mung shawa marai 30 jan ra nga, ginra masha ni tsun ai rai tim, kaja ta tut rim woi mat ai gaw marai 14 sha rai nna, dai ni yawng gaw August 28 ya shana maga hkying 3 aten Namya mare hta bai du yu wa sai lam chye lu ai.
Myen hpyen dap ni rim woi mat ai marai 14 hta, Kapmaw kaw jawng lung taw nga ai jawng ma marai 2, tara hkaw sara 1, Engineer marai 2 mung lawm mat ai lam chye lu ai.
Dai mung shawa marai 14 hpe August 24 ya shana hkying 10 daram aten Namya mare kaw na rim woi la nna, shawng lam shara hta, hpyen hking jahpun ya ai sha n ga, laknak arung arai ni gun shangun wa ai lam chye lu ai.