Myen hpyendap ni pawter rim woi mat ai Namya mare masha ni hte, mawdaw la ni hpe, dai na maga de ( August 26) du hkra rai n dat ya shi ai lam chye lu ai.
August 24 ya shana hkying 9 daram aten, Namya mare hta du nga ai Myen hpyen hpung ni gaw, ya ten lam pat nna chyat rawng nga ai mawdaw la ni hte, hpyen yen mung mare masha marai 100 daram hpe hpyen ninggang hku shaga rim woi nna, Hpaknat Uru hka hku maga de lung wa sai lam, dai ginra na mung shawa langai KNG shiga dap de tsun dan ai re.
“Mana hkying 8 hte hkying 11 lapran mare kata hkan rim hkawm wa ai. Namya buga hkalup hpung nawku jawng wang hta sa du hpyen yen nga ai ni hte mare kata na ni, mawdaw la ni, yawng hkan rim gahkyin ai ga rai nga ai, ning nawku hpung na magam gun 2 mung lawm mat wa ai. dai na maga de du hkra gaw rai n dat ya shi ai ga rai nga ai.” nga tsun dan ai re.
August shata 25 ya jahpawt hkying 4 aten, Nam Ya Myen hpyen dap kawng kaw nna, Senghpra maga de sinat kaba 2 lang gap shadam bun ai hpang, hkying 5 daram aten, Nam Ya hpyen dap na pru wa sai lam chye lu ai.
Mung mare masha ni hpe rim woi lang ai dai Myen hpyen hpung ni gaw, Senghpra mare mawdaw lam kaba hku na n lai ai sha, hkau na pa lam hku na lai lung wa sai lam, dai ginra na mung shawa langai KNG de matut tsun dan ai re.
Ya ten dai ginra hta laga mi Majan byin ai lam n nga shi ai rai nna, mung masha ni lawm ai lam a majaw, KIA ni hting nut mat ai masa nga ai lam, ginra masha ni matut tsun maram da ai re.
Ya ten dai Myen hpyen dap ni gara shara hta du nga sai ngu ai hpe KNG kaw na a tsawm tup hkrak n chye lu ai rai nna, rim woi mat ai mung shawa ni hpe mung ya ten du hkra dat ya ai lam n nga ai hpe chye lu ai.
Myen hpyen dap gaw lai wa sai shata ni hta mung Senghpra mung mare masha ni hpe, hpyen ninggang shatai woi hkawm ai majaw, amyu shayi langai si hkrum nna, marai 6 hkala sawng wa yu sai re.
Ya ten dai ginra hta Myen hpyen dap hte KIA dap lapran hpyen masa matut shaja hkat taw nga nna, mawdaw lam kaba hpe mung lahkawng maga dap na matut pat da taw ding yang re lam chye lu ai.
Ya ten Namya mare hta mawdaw 200 hkawt pat hkrum taw nga ai re lam chye lu ai.
