Myen hpyendap hka sanghpawli (9) gaw August 16 ya jahpawt hkying 9 daram aten, Shwegu kaw nna Manmaw maga de lai lung wa ai hta, lam lapran jahkring hkring hkap gap gasat hkrum taw nga ai re.
Myen hpyen hka sanghpawli ni, Shwegu kaw nna pru mat wa ai, hkying hkum chyen mi daram na ai hte, Shwegu Myen hpyen balik dap hpe KIA hte PDF dap ni drone hte bawm sa jahkrat bun ai hta, marai 2 hkala hkrum ai nga, dai ginra na mung shawa langai KNG shiga dap de tsun dan ai re.
“Sanghpaw pru mat wa ai kade nna ai, ndai maga de na balik dap hpe KPDF dap ni drone hte sa gap sai, marai 2 hkala hkrum ai nga tsun ma ai” nga nna tsun ai re.
Dai hpang, jahpawt daw hkying 11 daram aten, Manmaw maga de lung wa ai Myen hpyen Hka Sanghpaw li hpung ni hpe Wunpawng Mungdan Shanglawt Hpyen dap KIA Dung 5 hte Dung 12 dap ni, 107 mm laknak kaba 10 lang jan hkap gap bun ai hta, Myen hpyen hka sang hpaw li langai gap hkra ai re lam shawng lam hpyen shi sawk ni kaw na chye lu ai.
Dai zawn gap hkra ai hka sanghpaw li hpe kaga sang hpaw li langai hte Manmaw maga de dun lung wa taw ai nga, Shwegu PDF na lit nga ai magam gun langai KNG de ya na zawn matut tsun dan ai re.
“hka sanghpaw 9 lung wa sai le, dai hpe KIA hte PDF pawng hpawm hpung ni shani ka ang hkying 11 daram aten Zinbung makau hta laknak kaba hte hkap gap ai, langai hkra ai. dai gap hkra ai sanghpaw hpe sumri hte dun mat wa sai.” nga nna tsun dan ai re.
Shwegu kaw nna Manmaw de lung wa ai Hka sanghpawli hpe Myen hpyen dap n bung li lahkawng hte shim lam la ya taw ai lam matut chye lu ai.
Ya lung wa ai hka sanghpawli hta Myen hpyen dap ni gaw mung shawa n kau hte, n tara rim da ai bawng masha n kau hpe hpyen ninggang shatai let, htaw hkawm taw ai lam ginra masha ni tsun ai.
Ya ten dai hka sanghpawli hpung ni gaw, Manmaw de matut lung taw nga ding yang rai nna, mali hka kau, mare kahtawng 10 jan na mung mare masha ni hprawng yen hkawm taw nga ra ai re.
