Mungmyit Sinli, Muse ginwang, Namtau hte Hpahpik mare lapran mawdaw lam nmaw kaba hpe Myen hpyen dap ni htu di kau ai lam chye lu ai.
August 15 ya shani Hpahpik mare de htu shadut shang wa ai Myen hpyen dap ni htu di kau ya ai re lam, dai ginra na mung shawa langai KNG shiga dap hpe tsun dan ai re.
“mani shawng shani Myen hpyen hpung ni, Namtau kaw na Hpa Hpik mare de hpyen n gun htu shadut lung wa ma ai, dai kaw lana mi wa hkring nna, hpang shani n dai hku lam htu di kau ai rai nga ai.” nga nna tsun dan ai re.
Myen hpyen dap ni n dai zawn mawdaw lam htu di kau ya ai majaw, mung mare masha ni galaw lu galaw sha hte hkawm sa hkawm wa lam hta grai yak hkak taw nga ai lam chye lu ai.
Ya htu di ai lam gaw, Namtau, Hpahpik, Namgat, Mawtawng de hkrang ai mawdaw lam langai re lam chye lu ai.
Hpahpik mare gaw madung KIA dap ni shamu shamawt ai shara rai nna, Kokang MNDAA hte Balawng TNLA dap ni mung jahkring hkring wa du ai shara re lam chye lu ai.
Lai wa sai ten, dai makau grupyin hta balawng TNLA dap ni, lai sa lai wa mung mare masha ni kaw nna hkawn kang hta sha taw nga ai hpe Myen hpyen dap ni sa htim gap ai majaw, lahkawng maga si hkala ai lam ni mung nga wa sai re.
