Hpakant Kasen bum myen hpyendap hpe KIA/PDF sa htim gasat zing kau ai hpang, ya ten dai shara hta Myen hpyen dap ni bai wa dung taw sai lam chye lu ai.
August praw 7 ya jahpawt Nammaw hte Tamahkan lapran na, Kasen bum myen hpyendap hte Sezin mare mahkrai pawt hta dung ai SNA dap ni hpe sa gap jahten kau lai wa sai re.
Dai zawn sa htim gap gasat nat kau ya ai hpang, August praw 9 ya daram kaw nna, dai hpyendap shara 2 hta Myen hpyendap hte SNA ni bai wa dap dung nga sai raitim, ya ten Tamahkan hte Sengtawng lai sa lam hpe gaw pat tawn ding yang re lam, Tamahkan ginra masha langai KNG hpe ndai zawn tsun ai.
“Myen ni bai dung mat sai, gap ai lana mi sha re, shi gaw sa dung na matu gap ai n re, gap gaw gap zing kau ai hpya kau ai, shanglawt ni shan hte masing masa langai hte sa gap ai gaw rai nga ai. Zing na nga yang mung yak na sha rai nga ai, n bungli hpe gara hku mung hkam jan na n rai nga ai” nga nna ginra masha langai tsun dan ai re.
Dai hpyendap 2 hpe htim gasat zing kau ai hpang, laknak kaba, n bungli ni ding yang gap shadam bun wa ai hpang, ya na zawn bai wa dung taw ai lam rai nga ai.
Ya ten Myen hpyen dap gaw Sengtawng hte Tamahkan sa lam pat di da ai majaw, mare masha ni hkawm sa hkawm wa yak hkak taw nga ai re lam matut chye lu ai.
Kasen bum hte Nammaw majan a majaw, Nammaw, Tawng Kaw, Kawngsan, Mawlahke, mare kahtawng na mung shawa hkying mi jan Mawshan hpungkyi jawng hte Nawku hpung wang ni hta sag an machyu nna, August 11 ya shani yawng tinang mare buga bai n htang wa sai lam chye lu ai.
Ya ten Kasen bum hta Myen hpyendap ni bai wa dap jung nga nna, shimlam shagreng tawn ai zawn, KIA dap maga de na mung makau grupyin hkan shara naw matut la tawn ai masa re lam chye lu ai.
Myen hpyendap gaw KIO ginjaw ginra Namsan yang de hpyen man tawn, hpyen n-gun htu shakut nga ai ten, Hpakant maga de majan baw ai lam gaw, hpyen lagaw gang ai masa re nga, mung masa yu maram nga ai Sara langai KNG hpe ya na zawn tsun maram taw ai re.
“dai kaw sa gap ai ngu gaw, ginjaw ginra de hpyen n-gun nau htu shadut wa ai majaw, hpyen lagaw gang ai daram sha re ga rai ng ai. Shanglawt ni lu gap zing kau na a tsawm rai dung ai ngu gaw, Alaw bum hta lai na laga dung ai mi n mu ai ga rai nga ai. Hpa majaw n dung ai i nga yang, Bangga gaduk ni a tsawm lawan n lu shagreng yang gaw nbung li bawm hpe wa gara hku na n hkam jan lu ai ga rai nga ai.” nga nna tsun ai re.