Mungmyit Sinli ginra, Wunpawng Mungdan Shanglawt Hpyen dap KIA Dapba 4, Dung 9 ginra hta n dai laman shani shagu ngu na majan byin nga ai re.
Lashio kaw nna lung wa ai Myen hpyen dap ni Kuthkai Myen hpyen byuha dap hta wa du hkring la nna, Namhpakaka, Namhkam maga de mawdaw kaba hte ding yang lai lung taw nga ai majaw, lam lapran hta shani shagu ngu na KIA dung 9 ni hkap gap nga ai lam chye lu ai re.
“Lashio kaw na lung wa ai Myen hpyen dap ni Kuthkai Myen hpyen byuha kawng de lai shang shang rai nna, dai kaw na, Namhpakka, Namhkam de. Dai kaw na Jinghpaw mung Manmaw de bai matut lung ai lam ni nga taw ai nga na ai, ndai lam lapran kaw hkap gap ai gaw lagaw gang ai hku na hkap gap ai masa rai na re ngu maram lu ai law.” nga nna Kuthkai ginra masha langai KNG shiga de tsun dan ai re.
Ndai laman Kuthkai mare kaba kaw nna pru wa ai Myen hpyen dap ni hpe KIA dap ni lam lapran hta shani shagu ngu na hkap gasat taw ai rai nna, lai wa sai July 16 ya shana hkap gap gasat ai hta Myen hpyen dap maga sum machyi lam chye lu ai.
Lagaw lam dap hte lung wa ai Myen hpyen hpung ni gaw, lam ding yang mung mare masha ni a dum n ta kata yup nna, n tsen ai ni hpe rim jep ai lam, bai nna, Mawdaw ni hpe gumhpraw hta sha ai lam ni galaw nga ai lam,dai ginra na amyu shayi langai KNG de ya na zawn matut tsun wa ai re.
“Ya Kuthkai kaw na lagaw lam hte lung wa ai Myen hpyen dap ni wuhpung masum garan nna, Kuthkai lahta hte yang hkan na mare kata mung shawa n ta hkan shang yup hkawm taw nga ai, ngut na mung shan hte n tsen n hten ai zawn re ni mu yang rim adup san jep ai lam ni galaw ma ai. Lai wa ai mawdaw ni kaw na mung gumhpraw hkap hta sha nga ma ai.” nga tsun dan ai re.
Kuthkai kaw nna lung wa ai Myen hpyen mawdaw 8 hpe, Wunpawng Mungdan Shanglawt Hpyendap KIA Dung 9 ni, July 16 ya shani Namhpalun ninghtawn, Hpakhit mare hta hkap gasat ai re. Bai nna dai shana hkying 6 daram ten hta sha, Hkumung mare sinpraw maga. Kawngra Myen hpyen dap hpe a kajawng sa gap jahten kau da ai lam chye lu ai.
July 15 ya shana maga hkying 4 daram aten hta mung, Hpakhit Mare Myen hpyen dap hpe sa gap gasat lai wa sai re.
Ndai laman Mungmyit sinli ginra, Lashio kaw mna Myen hpyen dap ni Jinghpaw Mungdaw maga de hpyen n gun garum na matu ding yang shamu shamawt taw nga ai re.
