Zingri Sat Hkrum Ai Amu Hte Seng Nna Hparan Ya Na Matu Dum Nta Masha Ni Hpyi Shawn
Kuthkai ginwang, Manping mare masha langai hpe Kokang MNDAA hpyen hpung ni zingri sat kau ai mabyin hte seng nna, lit la hparan ya na matu dum n’ta masha ni hte ginra masha ni pawng hpawm na hpyi shawn mat na lam, Manping ginra masha langai KNG de tsun ai.
“Sa shaga ai shaloi Modo jak gram ya na matu Kokang hpyen hpung ni sa shaga mat ai re. Bai shana wa ai shaloi nanhte na masha si mat sai. Ka-ni dawm ai shaloi ndang hkam na si mat ai da. Raitim anhte gaw nkam na mang hpe hpaw yu na atsawm jep yu yang hkum hte nshang, shingma, maidang hkan adup da ai hkang ni grai law nga ai. Dai pyi mare de du na lu yu ai. Mang sa la ai shaloi Ko Kang ni gaw hpa mung n jep yu na matu jahkrit tsun dat shi ai re” nga na tsun ai.
Sat kau hkrum ai wa gaw asak 38 ning re Slg, Tu Lum rai nna, asak 7 ning re ma langai a kawa rai nna, June 6 ya shani n’ta kaw nga ai ten MNDAA hpyen hpung ni kawn Modo jak gram ya na matu sa shaga mat ai kawn ya na zawn sat hkrum ai re hpe chye lu ai.
Sat kau hkrum ai n’ta masha ni hpe MNDAA ni kawn Myen gumhpraw sen 35 sa jaw da ai lam nga nna, hpa majaw sat kau ai lam hpe gaw n’ta masha ni hpe tara shang sa tsun ai lam nnga shi ai majaw, lit la hparan ya na matu hpyi shawn mat na lam n’ta masha ni hte ni nawn ai kaga ginra masha langai kawn matut tsun ai.
“Anhte gaw htunghking salang ni hte rai rai, ginra kaw na lit nga ai salang ni hte rai rai ndai manghkang hpe jaw ai mahtai lu la hkra jawn mahtai tam mat na. Shanhte hku na mung tsun sanglang wa lu na matu. Ya gaw n’ta masha ni hte mare masha ni sha sa hpyi shawn sa san yang Ko Kang ni gaw hpa mung ahkyak nla ya nna, ahtik anang sa san yang san ai ni hpe bai rim adut na masa rai taw nga ai. Dai majaw, ginra kaw na wuhpung wuhpawng ni hte matut nna, galaw mat na lam nga ai re” nga nna tsun ai.
Laiwa sai 2021 shaning nnan daw hpang MNDAA hpyen hpung ni gaw Zup Awng hpyen yen dabang makau kaw dap jung shara jahkrat nga ai majaw, makau kaw nga ai mare mungshawa ni hpe rim jep ai lam jahkring hkring galaw ai majaw, shim lam nnga hkrit tsang ai hte shani shana myit tsang ai hte hkawmsa hkawmwa nga ra ai lam ginra masha ni tsun ai.
