Myen hpyendap hte pyithusit hpyen hpung ni hpe KIA hkap gasat

Sadung mare numshang, hka rum lawu shara hta Myen hpyendap hte Shwi Min pyithusit pawng hpawm hpyen hpung ni hpe Wunpawng Mungdan Shanglawt Hpyendap KIA kawn hkap gasat ai lam chye lu ai.

May shata 21 ya Jahpawt hkying 10 daram hta byin ai dai majan hta Myen hpyendap hte Shwi Min pyitutsit pawng hpawm hpyen n’gun 50 daram lawm ai rai nna, KIA maga mung n’gun 50 daram lawm ai lam chye lu ai.

Hkying hkum mi daram laja lana gasat poi byin ngut ai hpang, hkrat sum machyi hkala ai lam hpe gaw tup hkrak nchye lu shi ai re.

Ya majan byin ai shara makau hta jung tawn ai hkawn shagyit langai hpe lai wa sai May praw 8 ya shani Myen hpyendap hte pyithusit ni sa gap ai majaw, dai kaw gumhpraw hta ai marai 2 hte gat dut ai mung shawa langai si nna, Miwa gumhpraw Mun Sanit hte Myen gumhpraw sen mali tsa hpe mung la mat ai lam chye lu ai.

Dai shagyit gaw KIA matsun hte hpaw tawn ai rai nna, May praw 8 ya shani mabyin hta si mat ai mung shawa ni a dum nta hpe, Myen hpyedap ni gaw May 9 ya hte wan sa nat jahten nga ai ten, KIA hpyen hpung ni hte majan byin lai was ai re.

Ginra masha ni tsun ai hta 2021 ning, Myen hpyen dap daru magam rai n zing shi ai ten, dai gate kaw Myen hpyen dap hte Jarit sin hpyen hpung BGF ni dung ai shara re lam chye lu ai.

Waimaw, Kampaiti sa ai lam maw kaw nga ai Sadung ginra gaw Shanglawt Asuya Sadung uphkang Ginwang, Dap Dung 3 ni a shamu shamawt gaiwang rai nna, Myen hpyen dap maga mung Bawm Lang Pyitutsit, Shwi Min Pyitutsit ni shamu shamawt ai ginra re majaw, majan jahkring hkring byin ai lam chye lu ai.

Exit mobile version