Myen hpyendap n’gun 200 ram May 17 ya jahpawt Nam Ya Mare kaw na Kamaing de yu wa ai ten, mare kahtawng hkan na mungshawa ni hpe hpyen ninggang shatai rim woi mat ai hta nkau lawt pru sai raitim, nkau hpe rim da ding yang re lam chye lu ai.
Rim da hkrum ai ginra masha ni gaw Hkin Tawng, Ye Ka Tar hte Nam Ya mare na ginra masha ni rai nna, yawng 40 daram du ai re. Dai ni hta la kasha hkrai yawng marai 10 daram gaw rai n lawt pru shi ai re.
“Dai Myen hpyen hpung ni gara de bai pru na re nchye ai shanhte gaw hpyen ninggang bai galaw na shadu ai. Nkau ni gaw nlawt shi ai hpe chye lu ai. Num ni hte Ma ni sha lawt wa ai. Ramma La kasha ni naw ngam taw ai hpe chye lu ai’’ nga na Hpakan KIA/PDF hte ni kahtep matut mahkai nga ai Salang langai KNG de tsun ai re.
Mung shawa ni hpe rim woi mat ai dai Myen hpyen hpung ni gaw lai wa sai May 14 ya shani, KIA Dung (44) ginra rai nga ai Nam Tin Mare maga de hpyen hpung htu shang wa ai kaw KIA ni hkap gap gasat dat ai hta sum machyi ai lam ni nga na Nam Ya Mare maga de bai htingnut mat ai re hpe chye lu ai.
Nam Ya mare maga de ya na zawn Myen hpyen dap ni hpyen hpung htu shadut shang wa ai majaw, Nam Ya mare masha nkau ni hte Kap Maw Zup, Seng Hpara Mare na mungshawa ni hpyen koi yen nga ai lam chye lu ai.