KWAT: Myen hpyendap mung shawa ni hpe sat nat ai hte matai htang

KWAT a sumtang laika

Myen hpyendap gaw shi a sum machyi mat ai lam hpe, matai htang ai hku nna mungshawa hpe, sat zingri ai lam, shinggyim ahkaw ahkang tawt lai ai lam matut galaw nga ai nga nna, Thai mungdan daju Jinghpaw Wunpawng Amyushayi Hpung (KWAT) kaw nna sumtang laika hte ndau tawn ai re.

Lai wa sai March shata hta Wunpawng Mungdan Shanglawt Hpyen Dap KIA kaw nna Myen hpyen dap a post shara n kau hpe zing madu la kau ai hpang, dai hpe matai htang ai hku nna, mung shawa ni a n tsa shinggyim ahkaw ahkang tawt lai ai lam galaw wa ai re lam June 16 ya shani KWAT a sumtang laika hta ka tawn ai re.

Myen hpyendap gaw Alaw bum hpe tat kau ai hpang, Myothit Kunglaw mare kata de laknak kaba gap bun ai majaw, mare masha 6,000 jan Nmawk hte Manmaw mare kaba de hprawng yen ra mat ai rai nna, mungshawa marai 9 asak si sum sai hte marai 15 hkala hkrum sai lam tsun da ai re.

Bai nna, KIA hte matut mahkai ai ngu sha du let, ramma nkau hpe n tara majoi rim adup gayet zingri ai lam ni mung dingyang galaw nga ai lam dai sumtang laika hta ka tawn ai re.

Read Previous

Danai e rim hkrum ai ramma marai 29 hpe tara masat 17/1 hte jewat na matu dawdan

Read Next

July 7, KNG Daily News (Online Radio)

Leave a Reply

Your email address will not be published. Required fields are marked *