Shiga

MMA shingjawng poi kalang bai myit hkrum dat sai Nsang Awng La

MMA Middle Weight Championship Ninggang gashun shingjawng poi a matu kalang bai myit hkrum masat shagrin dat sai lam Nsang Awng La tsun ai re.

Lai wa sai February praw 7, Indonesia mungdan Jakarta mare kaba e shingjawng ai One Championship poi hta Brazil amyusha Leandro Ataides hpe Reiner de Ridder dang kau ai re.

Dai poi hta dang ai Netherland mungmasha Reiner hte Middle Weight Champion ninggang makawp maga shingjawng poi a matu hkap la sai lam, Awng La February 12 ya shani shi a Facebook hta ndau dat ai hpe mu lu ai.

“Reiner de Ridder gaw ginsup ningma lu da ai majaw ngai hte shingjawng na kadai mahtang rai na hpe nchye shi tim, hpa nra ai. Ndai Champion ninggang makawp ginsup poi lamang gaw grai yu pyaw ai lamang langai rai na hpe ga sadi jaw ai” nga nna tsun da ai re.

Reiner gaw asak 29 ning Netherlands amyusha rai nna, Nsang Awng La gaw asak 34 ning Jinghpaw Wunpawng amyusha rai nga ai.

MMA ginsup lamang labau hta, Reiner htwi shingjawng Poi 12 lang rai nna, sum ai poi nnga ai lam chye lu ai. Nsang Awng La a htwi shingjawng poi 36 hta 26 lang dang nna, 10 lang sum da ai re.

Awng La gaw lai wa sai October 13 ya shana Japan e galaw ai Light Heavy Weight shingjawng lamang hta Philippine amyusha Bradon vera hpe dang kau ai hpang, ya kalang bai htwi shingjawng na poi lamang mung rai nga ai.

 

Related Articles

Leave a Reply

Your email address will not be published. Required fields are marked *

Back to top button