Sezin hte Hummalin lapran na Yepawmi mare hpe KIA hte pawng hpawm maga dai ni shani ka-ang ten htim gasat zing madu kau lu wa ai lam dai ginra na magam gun Salang kaba langai KNG shiga de tsun dan ai re.
Yepawmi Sam mare hpe KIA hte pawng hpawm maga dai ni October 30 ya shani hkying 1 aten daram hta gasat zing madu la lu sai lam magam gun langai KNG shiga de n dai zawn tsun ai re.
“Yepawmi Sam mare hpe dai ni shani ka-ang hkying 1 ram hta zing la lu sai lo, laknak machyu pala gaw grai wa zing lu ai lam n nga ai, SNA ni yawng hta mat ma ai, pala latsa du n du ram sha lu ai, madung gaw mare hpe gasat zing lu ai ga rai nga ai,” nga tsun ai.
Ya gasat zing lu ai Yebawmi mare gaw, Uru hkanam, Jinghpaw Mung Sagaing jarit Humalin hte Sezin mare lapran na Sam mare kaji langai re lam chye lu ai.
Dai dap shara hpe gasat zing ai hta, laknak machyu pala ni grai wa zing lu ai lam n nga ai hpe chye lu ai re.
Ya gasat zing ai Yepawmi mare gaw KIA Dung (26) hte KIA Dung (31) matut ai ginra re lam chye lu ai.
Wunpawng Mungdan Shanglawt Hpyen Dap KIA Dapba (9) kaw na ya ten Hpyen man lahkawng hpaw nna, Myen hpyen hpe shingla gasat taw nga ai re lam chye lu ai.
KIA Dapba (9) kaw na hpaw da ai hpyen man gaw, Taung Oo hpyen man hte Lungtung Hpyenman ngu hpaw masat let htim gasat taw ai mung rai nga ai.
Lai wa sai bat hta Taung Oo mare hpe gasat zing ngut ai hpang, ya Yebawmi mare hpe bai htim gasat zing madu kau wa lu ai mung rai nga ai.
Ya ten dai grup yin ni hta, Tezalauk ( แแฒแแแฑแฌแแบ) ngu ai Sam mare langai sha ngam sai lam chye lu ai.
Dai mare hpe lu la kau jang gaw, Hummalin maga de sha nga mat sai lam matut chye lu ai re.
Lai wa sai October 27 ya shana yuptung hkying 12 aten hta, Nawnglut Ginra, Lungtung mare kaw dung ai Myen hpyen dap hte SNA ni pawng nna KIA ni dap jung tawn ai Hepan lam numbraw de htim gasat lung wa ai majaw, gasat gala majan byin wa ai hpe chye lu ai.
Myen hpyen maga sum machyi law wa ai majaw, jahpawt hkying 5 daram hta bai htingnut mat ai lam chye lu ai re.
Ya ten Indawnawng Sinna hkran maga Lung Tung, Hepan mare lam numbraw maga de hpyen masa matut shaja hkat taw nga ai re.
