Na Mawn Bum kaw dung ai SNA Dap ni kaw na, Hpyenyen Mung Shawa ni nga ai, Chaung Wa KBC Nawku Jawng wang de Suicide Drone sa jahkrat bun wa ai lam, ginra mung shawa ni kaw na chye lu ai.
October praw 5 ya shani Namawn kaw dung ai Myen Hpyen dap hte SNA ni shapyen dat ai Suicide drone langai Chaung Wa KBC Nawku jawng wang kaw wa hkrat kapaw ai lam, hpyen yen amyu shayi langai KNG shiga de tsun ai re.
“Sam Hkyeng SNA ni gaw လူမျိုးရေး၊ ဘာသာရေး manghkang byin hkra galaw ai re ngu maram lu ai, Hpyen hte seng ai hpa mung n nga ai, anhte hpyen yen dabang hpe sa gap bun ai ngu gaw shan hte kaw yaw shada lam nga ai ngu mu mada lu ai le,” nga tsun ai.
Suicide drone jahkrat bun ai majaw, mung shawa si hkala ai lam n nga tim, Nawku Jawng wang shara hpe shading wa ai majaw, jawng wang kaw hprawng yen taw ai hpyen yen mung shawa ni myit tsang taw nga ai re.
Ndai laman Indaw Nawng makau grup yin majan gap gasat hkat ai lam ni hpa n nga ai rai tim, hpyen yen mung shawa ni nga ai shara hpe ya na zawn Cuicide drone sa jahkrat bun wa ai rai nga ai.
Indaw Nawng grup yin hta majan byin ai lam n nga ai rai tim, Sezin SNA dap ni hpe KIA htim gasat ai lam ni galaw nga ai hpe chye lu ai.
Lai wa sai bat na Sezin majan hta SNA hte Myen Hpyen Pawng hpawm ni a laknak machyu pala padang dip zing la lu ai sha n ga, bawng masha hpe mung lu rim woi la ai nga, shawng lam hpyen magam gun ni tsun ai re.
Na Mawn Mare de Myen hpyen dap hte SNA ni pawng nna, mare kata de laknak kaba gap bun let shang wa ai majaw, Na Mawn mare mung shawa ni hprawng yen ra mat ai rai nga ai.
Na Mawn mung mare masha ni gaw dai ten KIA gasat shalawt da ai, Chaungwa mare de hprawng yen taw nga ai rai nga ai.
