Manmaw De Lai Lung Wa Ai Myen Hpyen Hkasanghpawli Hpung Hpe KIA Pawng Hpawm Ni Hkap Shingla Gasat

Shwegu kaw na lung wa ai Myen Hpyen Hka Sanghpawli hpe KIA PDF hkap shingla gasat ai hta Myen Hpyen Hka Sanghpawli 3 hpe hkap shingla gasat jahten kau lu nna, Sanghpawli kaba lahkawng sumpan hpraw sharawt asum jaw nna, hkin gau de kap wa ai hpe KIA maga yawng rim sharen da lu sai lam chye lu ai.

September praw 2 ya jahpawt hkying 6 daram kaw Shwegu na lung wa ai Hkasanghpaw hpung ni hpe KIA hte PDF dap maga, Ubat hkumlai (မြစ်ကျဉ်း) makau kaw hkap shingla gasat ai kaw sum machyi law wa ai rai nga ai.

Shwegu kaw Sanghpaw kaba nkau tawn da nna, sanghpaw kaji n kau lai lung wa ai hpe KIA maga hkap shingla gasat ai kaw Myen hpyen maga sum machyi law wa ai re lam, KIO Shiga magam dap lithkam Dukaba Nhpang Naw Bu KNG shiga de n dai zawn tsun ai re.

“Dai hpawt gaw Zinbung (မြစ်ကျဉ်း) makau kaw gap hkat ai da, dai kaw langai gap jahten kau nna, langai gaw hka kaw lup mat ai, langai gaw wan hkru mat ai lam hpe na lu ai, အလံဖြူထောင် ai ni mung nga ai, rai tim a tsawm tup hkrak gaw rai n shateng lu shi ai, rai mung she n rai na i? nga ,” tsun ai.

Ya ten Myen hpyen Hka Sanghpawli 5,6 daram gaw Sinhkan mahkrai n pu kaw dau yin nga nna, lung mung n mai, n htang yu mung n mai rai, dau yin taw ai lam, shawng lam hpyen magam gun ni tsun ai kaw na chye lu ai.

Sin Hkan Mahkrai hku dai hpawt Speedboat 2 lai lung mat ai hpe matut hkan gap gasat taw ai lam chye lu ai.

Dai hpawt lai lung mat ai Speedboat hpe mung Pawng hpawm dap maga hkan gap gasat ai lam ni galaw nga ai lam, Dukba Naw Bu matut tsun ai re.

Myen Hpyen Hka Sanghpawli hpung maga sum machyi law ai majaw, Mandalay de na Hpyen gasat nbungli lahkawng rau run run rai lung nna, 30 lang jan wa jahkrat bun ai lam nga ai hpe chye lu ai.

Dai hpawt hkap shingla gasat ai kaw, Myen hpyen maga sum machyi law nna, hka de gum htawn bang mat ai ni mung law law nga lai wa ai nga, shawng lam magam gun ni tsun ai re.

Myen hpyen ni  lai wa sai August 31 ya shani Zinbung dap hpe bai lu na matu, hpyen n-gun kaba hte bai htim gasat yu ai rai tim, Myen hpyen maga sum machyi lam law ai hte bai hting nut mat ra mat ai lam chye lu ai.

Ya na zawn KIA pawng hpawm dap maga shara la tawn ai de Myen hpyen ni kanaw shang wa ai majaw, Myen Hpyen hpung maga sum machyi lam law ai masa re hpe mu lu ai lam, shawng lam hpyen magam gun hte ni nawn ai ni tsun ai.

Dai Sanghpawli hpung ni gaw, Mandalay kaw na August 21 ya shani lung wa ai Sanghpawli hpung ni re lam chye lu ai.

Myen hpyen ni gaw, Manmaw hpe gasat na matu Hka Sanghpawli hku hpyen n-gun laknak machyu pala the malu masha htaw lung wa ai rai nga ai.

Lai wa sai shaning hta mung Hpyen Sanghpaw kaw na laknak malu masha hpyen n gun shadu la lu ai majaw, gasat zing da ai shara n kau bai tat sum kau ra mat ai re.