Dai hpawt manap Shwegu malihka Sinna hkran Sin Tat(ဆင်တပ်), Ye Lay(ရေလဲ) mare ni kaw Jet Nbungli lahkawng hte bawm wa jahkrat bun kau da ai lam, ginra masha ni tsun shana wa ai re.
Dai hpawt hkying 10:10 ten kaw Mandalay na lung wa ai Myen Hpyen Jet Nbungli bawm lahkawng hte Shwegu htawra hkran Sin Tat(ဆင်တပ်), Ye Lay(ရေလဲ) mare ni kaw wa jahkrat ai lam ginra masha langai KNG shiga de n dai zawn tsun shana wa ai re.
“Myi hkying 10 jan hkying 10 Minute 10 kaw Jet Nbungli lahkawng hte Shwegu htawra hkran Sin Tat(ဆင်တပ်), Ye Lay(ရေလဲ) mare ni kaw wa jahkrat bun kau da sai, Sin Tat mare kaw bawm 2 hkrat nna,Ye Lay kaw langai, ကျောက်တစ်လုံး kaw langai hkrat ai, Si hkala hkra machyi ai lam ya law law se gaw rai n chye shi ai,” nga tsun ai.
Myen Hpyen Jet Nbungli bawm a majaw, Shwegu ginwang na mare kahtawng 3 kaw wa hkrat bun wa ai rai nga ai.
Nbungli bawm wa hkrat ai hta mung shawa si hkala ai lam hte seng na gaw tup hkrak rai n chye lu shi ai re.
Shwegu ginra kata majan byin ai lam n nga tim, Myen hpyen maga nbungli bawm shani shagu ngu na daram wa jahkrat bun taw nga ai re.
Myen Hpyen Lagaw dap ni Shwegu ginra na KIA KPDF htim gasat tawn ai shara ni hpe htim gasat taw ai rai tim, sum machyi lam law ai majaw, hpyen nbungli kaw na masha n gun wa sa ai lam galaw nga ai lam matut chye lu ai.
“Dai hpawt Jet Nbungli kaw na bawm jahkrat ngut ai hpang, Y12 nbungli kaw na masha n gun bai wa jahkrat taw nga ai,” nga Shwegu ginra masha langai matut tsun dan ai re.
Ndai laman Myen hpyen hpung ni Ngabatwa (ငါးဘတ်ဝ) mare lam hku pru shang galaw taw ai majaw, KPDF dap maga Ngabatwa (ငါးဘတ်ဝ) mahkrai hpe Drone hte bawm kapaw jahten ai lam ni nga ai hpe chye lu ai.
Drone bawm hte Kapaw jahten ai rai tim, nmai lai hkra hten mat ai n re sha, masha gaw matut naw hkawm sa mai ai hpe chye lu ai.
August 18 ya shani hta mung Myen hpyen Jet Nbungli hte Myokung Tsirung hpe bawm wa jahkrat ai majaw, Tsirung n ta yawng hten ayai mat ai hpe chye lu ai.
Ndai laman Shwegu ginra hta majan gap gasat ai lam ni grai wa n nga ai rai tim, Myen hpyen maga na Y12 nbungli kaw na shani shagu ngu na ram bawm wa jahkrat bun nga ai lam hpe chye lu ai.
Ndai laman Mandalay kaw na Jinghpaw mung maga de Myen hpyen hka sanghpaw ni bai lung wa na lam tsun taw ai rai tim, KNG maga alak mi shateng lu ai lam gaw rai n nga shi ai re.
