Jinghpaw mung Sinpraw dingdung, Hkawnglanhpu ginwang de majan gasat gala matu byin taw nga ai lam chye lu ai.
masat shadaw (30) kaw na, Shinghkawng mare maga de KIA matut htim gasat nga ai majaw, majan byin nga ai lam shawng lam magam gun the matut mahkai nga ai magam gun langai KNG de n dai zawn tsun ai re.
“Masat shadaw (30) Sha Ga Di Mare hpe gasat zing ngut na Shinghkawng maga de bai htim gasat taw nga ai, ndai laman gaw shani shagu majan byin taw ai lam na ai le,” nga tsun ai re.
Hkawnglanhpu Miwa jarit mayan de KIA majan hpaw ai ya shata lahkawng hkawt na wa sai re.
Shatami lahkawng daram htim gasat ngut ai hpang, ya ten Shing Hkawng mare hte ni dik shara ni kaw gasat hkat taw ai lam shawng lam hpyen magam gun ni tsun ai.
Hkawnglanhpu majan man hta, Wunpawng Mungdan Shanglawt Hpyendap Dung (48) Lisu Dapdung hte Dai Lawn Rung kaw na madung litla woi awn htim gasat nga ai re lam chye lu ai.
Dai ginra gaw, Bum shagawng tsaw ai ginra ni re majaw, lusha sa ai lam hta mayak nga ai rai tim, ginra mung shawa ni a madi shadaw lam hte htim gasat nga lu ai masa re.
Ya na zawn htim gasat nga lu ai gaw, mung shawa madi shadaw lam hpe lu la da ai majaw re lam, dai ginra shawng lam hpyen man hta tsap nga ai magam gun langai KNG de tsun dan ai re.
Hkawnglanhpu shawng lam ginra hpe htim gasat nga ai lam hta KIA Lisu dapdung (48) hpung ni Nmaihku kaw dap dung jahkrat nna nan, shawng lam hpe woi kaman taw ai lam chye lu ai.
Ndai laman na majan hta Myen hpyen dap maga sum machyi law taw ai majaw, Putao Myen hpyen daju kaw na hpyen n-gun laknak n-gun ni hpe Hkawnglanhpu ginra de jat bang taw nga ai lam Putao ginra masha ni tsun ai re.
Wunpawng Mungdan Shanglawt Hpyendap a Sinpraw Dingdung htim gasat majan masing gaw kaba ai re majaw, majan chyinghkraw matut galu na masa nga ai lam hpyen masa yu maram ai ni tsun ai re.
