Dai ning Hpakant Hka Hpyen tsin yam hkrum sha ai hta, Mung shawa marai 2 si nna dum nta tsa lam hten za hkrum ai nga Hpakant ginra masha ni tsun ai re.
Si hkrum ai marai lahkawng hta, Ma langai gaw Kanu yan Kawa n-hku kata rawng nga ai ten, shinggan de wa tai tai le mat nna, hka kaw hkrat si mat ai rai nna, kaga langai gaw, gat dut hkawm ai kaw si lawm mat ai re lam chye lu.
“Ma chyangai lim si mat ai gaw, kanu yan kawa a tsawm n woi ai majaw, hka kaba taw nga ai ten, n ta n tsa na hkrat si mat ai rai nga ai, bai langai rai jang gaw gat dut hkawm taw ai numma langai hka kaba wa ai ten kaw ang nna, hka hpungla kaw yawng si mat ai, dai lahkawng re ga rai nga ai; Dum n ta hten za ai chyawm gaw shi kaba re, Hpakant ting kaw kaba ai re nga yang, jahpan atsawm tup hkrak gaw n chye lu ai,” nga tsun ai re.
Hka kaba ai majaw, n mai rawng mat hkra hten mat ai dum n ta jahpan gaw, ya du tup hkrak rai n chye lu shi ai rai tim, loi li hten mat na bai gram rawng ra mat ai dum n ta Shi kaba re lam chye lu ai.
Hpakant kaw hka hpyen hkrum ai lam gaw, dai ning sawng dik rai nna, dum n ta law law hten za hkrum wa ai lam hpe mu mada lu ai re.
Dai zawn hten za mat ai dum n ta ni hpe bai gawgap la na matu madung ra ahkyak taw nga ai gaw Ja gumhpraw re lam garum kahtau hpung na lit nga ai Salang langai tsun ai re.
Hka kaba ngut ai hpang, lam n maw kaba hte ahkyak ai hka lam ni hpe gaw jasan ngut sai rai tim, lam kaji n kau hkan na, hkum pup zai pru ni hpe naw seng ra ai majaw, garum ningtum lam ni matut ra taw nga ai re.
Hpakant hka kaba hkrum ai hpang, Lungseng Company gade law ai rai tim, ginra madu ni hkrai mai byin ai hku na shakut galaw la taw ai lam garum kahtau hpung kaw lawm ai Salang langai KNG shiga de n dai zawn matut tsun dan ai re.
“Hpakant kaw Lungseng Company gade law tim gadai gara Company mung, jasan jaseng ai kaw jai lang na matu nga na Back Hold, Dozer, langai mung gadai n sa garum ma ai, anhte mare lawk hkan na mung shawa ni hte garum kahtau hpung ni hkrai mai byin ai hku shakut galaw la ai re. Asuya kaw na mung hpa n garum ai, Sipin kaw na hka htaw mawdaw langai chyawm bang da ya ai. Dai sha re, Myen Hpyenla the Balik ni mung lani mi sha sa galaw dan masu nah pang shani kaw na gaw mat mat sai, majoi Han Pya hku galaw dan ai sha re.” nga tsun dan ai.
Hpakant Hka Hpyen hkrum ai mung shawa ni ya ten, Ja gumhpraw malu masha garum ningtum lam ni naw matut ra ai lam mung shawa ni ntsun ai re.
