Myen Hpyen Asuya mai kaja ai lam hpe htawng madun na matu, Udi manu shayawm na dut na lam hpe T.M.W.Y.M (သမဝါယမ) hpang de Asuya tsun wa ai hpe mung shawa maga n hkap la ai lam chye lu ai.
Myen Mung kata Udi langai manu lap 1000 nga ai hpe, Asuya kaw na 550 sha dut na matu matsun ai hpe .M.W.Y.M (သမဝါယမ) maga n hkap la ai majaw, gat lawk kata kaga gunrai manu ni mung grau tsaw rawt wa taw ai lam chye lu ai.
Ya ten Myitkyina Muklum kata Udi manu Udi langai hta 1000 manu nga ai hpe 750 shayawm dut na lam matsun ai hpe chye lu ai.
Myitkyina kaw ndai laman lam hten nna, gara de na gunrai mung n shang ai majaw, gunrai manu tsaw rawt ai majaw, Udi langai mi 1500 rawt na shiga ni pru taw ai lam, Myitkyina ginra amyu shayi langai KNG shiga de n dai zawn tsun ai re.
“Yawm chyawm yawm grau she hpu wa na masa rai taw ai, ya Udi langai 1000 re, 1500 du wa na zawn she rai taw ai, ya Myitkyina kaw gaw gara de na gunrai mung n shang na yak nga ai,” nga tsun ai.
Hpyen Asuya kaw na, gunra shang lam ni yawng pat da ai majaw, Dusat tsi mawan hte n-gun tsi ni dumhprut wa ai a majaw, ya na zawn gunrai manu laja wa ai re lam tsun da ai re.
Ya ten Myitkyina gat kaba kaw Myitkyina Udi langai lap hkying mi dut nga ai hpe Asuya maga 750 dut na matu tsun ai rai tim, gat dut hpaga hpung ni kaw na n hkap la lu ai sha, mi na manu hte hkrai dut nga ai hpe chye lu ai.
Min Aung Hlang daru magam zing kau ai hpang, Myen mung kata gunrai manu yawng tsaw rawt mat ai hpang, Ja manu, gumhpraw galai manu the kaga sut hpaga rai ni yawng, Asuya masat ai manu langai, gat lawk kaw dut mari ai manu langai dai hku rai, dut mari hkat taw ai lam chye lu ai.
Asuya masat da ai Ja lap mi hta Sen 67 nga ai rai nna, kaja ta tut kaw dut mari ai gaw, Sen 95 hte dut mari taw ai lam chye lu ai re.
Gumhpraw galai manu hta mung, Asuya masat tawn ai Ameracan Dollar mi hta kyat lap ၃၅၀၀ sha masat tawn ai rai tim, shinggan gat lawk ni hta gaw, 5000, 6000 hte dut mari galai hkat taw ai hpe chye lu ai re.
