Jinghpaw mung, hkawnglanhpu ginwang, miwa mung jarit mayan hpe sut n hprang htu na matu Miwa lauban n kau ginra masha ni hpe sa zin lum taw ai nga, dai ginra na mung shawa ni tsun ai re.
Myen Hpyen Dap npu, Hkawnglanhpu Pyithutsit hte Miwa lauban ni pawng nna, Shinghkawng mare sinna maga Jarit mayan kaw n hprang htu na matu hkyen shajin taw ai lam ginra masha langai KNG de ndai zawn tsun ai re.
“Myen Hpyendap npu Pyithutsit ni up hkang tawn ai bumga ginra ni hta, Nhprang htu na matu hkyen taw ai grai na sai, ya n dai laman hta she Pyithutsit Myen Hpyen ni Miwa shaga bang na ginra masha ni hpe zinlum taw ai,” nga tsun ai re.
Dai ginra kaw Nhprang htu na lam hpe ginra mung shawa ni gaw ninghkap taw nga ai rai tim, Miwa lauban ni hte laknak hpai da ai Pyithutsit hpyen hpung ni gaw laning mi gade jaw na ngu tsun let zinlum taw nga ai hpe matut chye lu ai.
Maga mi de zinlum ai lam galaw nna, maga mi de gaw sinat laknak hte jahkrit sharim ai lam ni mung nga ai hpe chye lu ai.
Dai ginra hpe Pyithutsit ni up madu da ai ginra hpe wunpawng mungdan shanglawt hpyendap kaw na, ndai shata praw kaw jarit masat shadaw (30) ginra na Pyithutsit dap shara 3 hpe gasat zing kau sai re.
Dai ginra hta nhprang htu na matu lai wa sai 2025 ning kaw nna, Putao Myen hpyen dap daju, Hkawnglanhpu Pyithutsit, Miwa lauban ni pawng na nhprang htu na matu hkyen shajin da ai ginra langai mung rai nga ai.
Ya ten dai ginra mayan hpe Wunpawng Mungdan Shanglawt Hpyendap KIA hte pawng hpawm dap ni laja lana majan gasat poi matut byin nga ai re.
Maga mi de ginra masha ni hpe zinlum taw nga ai zawn, Myen Hpyen dap hte Pyithutsit ni pawng nna, Naymyeshinlinye ga baw hte htim gasat majan baw ai lam ni mung galaw nga ai hpe chye lu ai.
Nhprang htu shaw na lamu ga law malawng gaw, ginra mung shawa ni jiwoi jiwa ban prat law law kaw na, Shaugaw, Bagaw ni hkai sha ai lamu ga re hpe chye lu ai.
Dai ginra gaw, madung Miwa mung de dut ai Shaugaw, Bagaw ni hpe hkai ai lamu ga ginra rai nna, Nam maling bum alang na tsi hkrung tsi nan tam dut let kanbau bungli galaw ai ginra langai mung rai nga ai re.
Ya Nhprang htu na hkyen ai ginra gaw, Putao hte deng 100 jan tsan ai ginra rai nna, hkrunlam matut mahkai yak dik ai ginra langai re majaw, madung miwa mung de na lusha ni hpe htaw shalai la ai ginra re lam chye lu ai.
