Waimaw ginra de, Hkauhting Hkauna galaw nga ai mung shawa ni ya ten, Mam manu hta gunjang manu grau hpu ai majaw, Mamhkai la na mayak byin taw ai lam chye lu ai re.
Hkrit tsang ra ai lapran kaw galaw lu galaw sha ra ai sha n ga, gunrai manu ni yawng tsaw rawt tim, Mam manu gaw bai n nga re majaw, hkauna galaw masha ni mam hkai gunjang shaga na matu yak hkak ai lam hte seng na Washawng mare na amyu shayi langai KNG shiga dap de ndai zawn tsun dan ai re.
“Hkauna htu na matu Sau manu gaw hpu, arang gaw kaba, mam hkai gunjang manu lani mi mun masum rai nga ai ya na manu gaw, hkauna galaw ai ni wa arang gaw law Mam manu gaw bai n lu rai na yak hkak nga ga ai,” nga tsun ai re.
Waimaw hte Washawng lapran, lai wa sai 2024 ning majan byin wa ai ten kaw na, mung shawa ni yawng hprawng yen mat ra ai rai nga ai.
Dai zawn mung shawa yawng hprawng yen ra mat ai rai tim, Hkauhting hkauna lu ai mung shawa n kau gaw, tinang a hkauna hpe n kam hkam kabai da ai majaw, shakut na wa galaw ai ni nga ai rai tim, mam hkai na masha n lu ai mayak hkrum taw ai re.
Maga mi de hkrit tsang let wa galaw sha ra taw nga ai kaw, ya na zawn lam amyu myu myu mayak byin hkrum taw ai lam rai nga ai.
Ya ten Mam hkai gunjang marai langai hpe lani mi lap mun 3 jaw na shap ra ai rai tim, sinat pala lapran galaw lu galaw sha ra ai majaw, Mam hkai na masha n nga ai masa re lam dai ginra na Salang langai mung KNG shiga de ndai zawn matut tsun ai re.
“Madu ni gaw saw shaga ai, ga sa, gunjang sa na ni mahtang n gwi ai le, ကုန်းတစ်တန်၊ ရေတစ်တန် sa ra ai hkrai re. hkatum manu hte hkawm sa jarit pyi n loi ai, Myen ga malai hku tsun ga nga yang, ဆီဖိုးနှင့်ချွန်ဖိုးမကိုက်ဘူး nga baw rai nga ai” nkau gaw sau manu gaw lu ai rai tim mung sinat machyu pala kata kaw gadai n gwi sa ai, hkauna law malawng gaw ya n dai makau grup yin kaw galaw ai gaw n nga ai daram she rai mat sai, htaw grai tsan dik ai de hkrai wa galaw mat ai majaw, masha mung shaga la yak dik mat ai masa rai nga ai,” nga tsun ai re.
Hpyen yen dabang kaw na Hkauna de sa sa wa wa galaw na matu sengke sau manu mun 5 daram ma ai majaw, mam hkai masha nlu ai masa re lam ginra masha ni tsun ai.
Dai kaw nga ai sam hpu nau n kau gaw, mam hkai masha n lu ai a majaw, mam gat ai ladat hte galaw ai ni mung nga ai lam matut chye lu ai.
Gat ai hte hkai ai shadang gaw, mam pru ai shadang grai shai ai rai nna, gat hkai na rai yang mung May shata ram kaw na gat hkai ra sai lam hpe chye lu ai.
Waimaw hte Washawng lapran na mung mare masha ni yawng gaw, Nawnghkying maga de hprawng yen ma ai rai nga ai.
