Njang Hka Kaw Manam Shagram re ai Hka Sa Ru Bang Taw Ai Majaw, Makau Grup Yin na Mung Shawa Ni Nga Yak Ai Lam Byin Nga
Myitkyina Muklum Shatapru Wabaw lam n tsa na Njang Hka, Japan Mahkrai n pu kaw Manam shagram re hka ni jahkring hkring sa ru ai majaw, dai makau grup yin nga ai mung shawa ni nga yak taw ai lam ginra mung shawa ni tsun ai re.
Dai zawn Manam shagram, maza mala re ai hka ni hpe sa ru bang ai majaw, dai hka lam mayan yawng manam shagram lam ni byin nna, Shatapru Njang Kawng hkan na mung shawa ni nga yak taw ai lam ginra masha langai ndai zawn tsun ai re.
“Dai kaw manam shagram re n tsin sa ru ai ah shawng myi chyaw mu ai pyi shi lang jan dang rai sai, pung ahpraw hte Mawdaw Hijet, Tungbeing hkan htaw sa wa nna, dai hku sa ru bang kau da ma ai, shan the sa ru kau da ai hpang gaw, makau grup manam shagram lam ni byin ai le.” Nga tsun ai re.
Manam shagram re ai hka ni hpe Pung hpraw kaw bang nna, Hijet Mawdaw, Tung Being ni hta htaw nna, sa ru ru re hpe mu ai lam ginra masha ni tsun ai re.
Lai wa sai ten hkan gaw, Njang hka grai san seng ai hku lwi tsawm ai rai tim, n dai hpang de gaw, maza gabai manam shagram re ai hka ni sa ru bang re majaw, dai hka shi tsep kawp n san seng mat sai lam tsun ai re.
Dai zawn Njang Hka nsan n sen re ai kaw rai tim, n chye ai mung shawa n kau gaw, Nga hkwi nga rim ai lam ni matut galaw nga ai hpe mu lu ai nga matut tsun ai re.
Manam shagram re ai hka ni hpe sa ru bang taw ai gaw, lusha seng hkan na ni re ngu maram lu ai rai tim, gadai gara seng na re ai ngu hpe tup hkrak n chye lu shi ai re.
Ya na zawn hka kaw maza sa kabai manam shagram re ai n tsin ni sa ru taw nga ai lam the seng nna, lit nga ai mare lawk salang ni kaw na ja ja ahkyak la ya na matu ginra masha ni hpyi shawn nga ai re.
