Mogaung, Kyun Taw Lawk Uphkang Salang lata ai kaw, Pyithutsit Ningbaw Jan n lata la hkrum ai majaw, lata hkrum ai Salang wa hpe rim adup zingri galaw lai wa ai, Pyithutsit ningbaw wa hte shi madu jan yan hpe Mogaung D.K.Ts kaw jep joi taw nga ai lam, ginra masha ni kaw na chye lu ai.
Mogaung Kyun Taw lawk Salang lata ai kaw Mogaung Pyithutsit ningbaw Slg Tin Moe a Madu jan, Daw Htwi Htwi mung shang shing jawng wa ai rai tim, dai lawk kaw na myitsu kanu kawa ni gaw Pyithutsit Daw Htwi hpe n lata ai sha, Slg Seain Kyaw Hlaing(စိန်ကျော်လှိုင်) hpe sha sindan pa jaw nna, lata wa ai majaw, ya na zawn byin ai re nga, Mogaung ginra masha langai KNG shiga de n dai zawn tsun ai re.
“Mogaung Kyun Taw lawk Salang lata ai kaw Mogaung Pyithutsit ningbaw Slg Tin Moe a Madu jan, Daw Htwi Htwi mung shang shingjawng wa ai rai tim, dai lawk kaw na myitsu kanu kawa ni gaw Pyithutsit jan Daw Htwi hpe n lata ai sha, Slg Seain Kyaw Hlaing(စိန်ကျော်လှိုင်) hpe sha sindan pa jaw nna, lata wa ai majaw, dai Lata hkrum ai Slg Seain Kyaw Hlaing wa hpe Pyithutsit hpyen hpung hte sa rim woi la shangun nna, adup gayet zingri di galaw wa ai,” nga tsun dan ai re.
Pyithutsit Ningbaw yan la kaw na n tara ai Lawk salang lata hkrum ai wa hpe rim zingri ai majaw, dai lawk kaw na Myitsu kanu kawa ni Mungdaw madang de shawk shawn ai hpang, ya na zawn Pyithutsit Ningbaw yan la hpe rim ahkyak la ya wa ai re lam chye lu ai.
Slg Tin Moe hpe Pyithutsit Seain Kyaw Hlaing na hpyen hpung ni June 26 ya shani rim woi mat hpyen hpung ni June 26 ya shani rim woi mat mat ai majaw, ginra masha ni n tsa tsang de shawk shawn ai hpang, dai Pyithutsit yan la hpe Mogaung D.K.Ts kaw na June 29 ya shani rim woi da nna, san jep taw nga ai lam chye lu ai.
Ya ten Mogaung D.K.Ts hpyen dap kaw, Mare lawk salang lata hkrum ai, Slg Seian Kyaw Hlaing hte Pyithutsit Ningbaw yan la lahkawng yan hpe shaga da nna, san jep taw ai lam chye lu ai.
Pyithutsit ningbaw yanla lahkawng yan hpe rim da ai rai tim, Madu jan Daw Htwe gaw Pahkam hte June 30 ya shani bai pru wa lu sai lam chye lu ai.
Mogaung Pyithutsit Ningbaw Daw Htwe ngu ai wa gaw, Myen Hpyendap hte pawng nna, Mogaung Muklum kata Hpaida wang, Kani dut garan jaw ai lam ni galaw ai Pyithutsit Ningbaw Jan wa re hpe chye lu ai.
Pyithutsit ningbaw shara hta Madu wa na Mying jai lang taw ai rai tim, kaja ta tut hta gaw, madu jan Daw Htwe she mying kaba ai nga Mogaung ginra masha ni tsun ai re.
