Ndai laman Myitkyina de marang kaba ding yang htu nga ai majaw, Myitkyina Sumprabum lam kaba lapran, Tang hpre mare du wa mahka Chying Ma Prang kadawng du ni wa mahka na sharaw gumhtawn Hka mahkrai chyen mi daw ru taw ai majaw, Mawdaw kaba lai n mai ai madang byin taw ai lam ginra masha langai KNG shiga de tsun dan ai re.
“Ndai laman anhte de marang grai htu ai gaw, marang nau htu ai majaw Tang hpre mare rai n du shi yang Chying Ma Prang kadawng n pu na sharaw gumhtawn Hka mahkrai chyen mi daw ru mat ai, dai ni hte rai yang, n htoi lahkawng ya rai sai, Mawdaw kaba lai n mai ai, Mawdaw kaji the Sengke ni gaw, makau hku na garet lai nga ma ai,” nga tsun ai re.
Lai wa sai June 28 ya shani marang kaba nau htu ai majaw, Mahkrai mara da ai ga gyi mat ai majaw, mahkrai chyen mi gyi lawm mat ai lam chye lu ai.
Mawdaw lam kaba n tsa na Sharaw gumhtawn hka mahkrai gyi taw ai majaw, Sumprabum, Putao de lung ai gunrai htaw mawdaw kaba lai n mai mat na, Mawdaw kaji n kau hte Sengke ni gaw, makau hku na garet lai taw ai lam chye lu ai.
Dai mahkrai hpe lit nga ai Asuya ni kaw na lawan ladan gram ya na matu mung shawa ni hpyi shawn taw ai rai tim, lit nga ai Asuya ni wa du yu ai lam hta lai nna, bungli masing galaw wa ai hpe ya du hkra tsep kawp hpa rai n mu lu shi ai nga tsun ai re.
Ndai shata laman Jinghpaw mung kaw marang htu sawng nga ai majaw, lam n maw kaba hkan ga sharut gyi ai lam ni byin law nga ai re.
