Mabeing, Nga-Oo maga de na gasat lung wa ai Myen Hpyen Hpung ni Shwegu Mare de du shang sai lam shawng lam hpyen magam gun ni tsun ai re.
Nga-Oo kaw na Shwegu de man yawng nna htim gasat taw nga ai Hpyen hpung ni gaw, Mani Shwegu de a tsawm sha shang mat wa lu sai nga PDF magam gun langai KNG shiga de n dai zawn tsun ai re.
“Nga-Oo kaw na Shwegu de man yawng na htim gasat lung wa ai hpyen hpung ni ram ram law ma ai, mani gaw Shwegu de shang mat wa sai, Mawdaw kaba 30 daram re, Hpyen n-gun gaw gade daram re ai kun a tsawm n chye ai, Mawdaw kaba ni hte hkrai re,” nga tsun ai.
Ndai laman gaw Shwegu de du shang wa ai hpyen hpung ni hte KIA PDF pawng hpawm ni Shwegu lahta Nga-Oo Shwegu lam numbraw, Masum brun ginra hta shani shagu majan laja lana matut byin taw nga ai re.
Shwegu kaw du shang taw sai Myen Hpyen hpung ni gaw, Manmaw maga de bai man yawng lung wa taw nga ai majaw, Shwegu lahta lam numbraw shara kaw gasat poi laja lana byin taw ai re nga, PDF magam gun wa n dai zawn matut tsun ai re.
“Shwegu kaw na Manmaw de kaga lam langai hku na bai pru ai, dai myen ni pru wa ai Shwegu lahta, lam numshe 4 nga ai lam numbraw hte yang kaw shani shagu gap hkat taw nga ai, dai kaw na lai jang gaw Manmaw de matut lai lung na hku rai nga ai,” nga tsun ai.
Dai hpawt manap hkying 7 ten daram hta mung Shwegu grup yin kaw Myen hpyen nbungli hte laja lana wa jahkrat bun wa ai re.
Myen hpyen n bungli bawm a majaw, Mung Shawa dum n ta hten za si hkala ai lam hpe a tsawm tup hkrak rai n chye lu ai re.
Ndai laman Shwegu hte Nga-Oo lam lapran Manmaw de lung wa lam ni hta majan matut nan aw laja na masa nga ai lam, hpyen masa yu maram ai ni tsun da ai re.
Lai wa sai June 8 ya shani KIA Dung (12) kaw na, Shwegu mung shawa ni mare kaw na hpawng yen na matu hte Nga-Oo Shwegu lam nmaw kaba hpe n jai lang na matu tsun sadi jaw da ai re.
