Mungmyit Sinli, Muse ginwang, Nam-Um mare na, Nammwi Hka kaw ja htu taw ai SSPP magam gun marai 3 hpe sa rim woi mat ai kaw na, ga shawng shai hkat wa ai lam chye lu ai.
KIA Uphkang tawn ai Nam Mwi hka kaw SSPP dap ni, hpa shiga n jaw ai Ja htu sha nga ai majaw, KIA magam gun ni gaw, Ja htu nga ai SSPP a masha marai 3 hpe shaga woi mat ai majaw, SSPP hte KIA lapran Ga shawngshai hkat wa ai re lam ginra masha langai KNG Shiga de n dai zawn tsun ai re.
“Nammwi hka kaw SSPP ni ja sa htu taw ai hpe, magam dap de shiga n jaw ai majaw magam dap na ni dai kaw ja htu taw nga ai SSPP ni a masha marai masum hpe sa rim woi mat ai rai nga ai. dai sa rim woi ai ni gaw GMH ginra Mung Shawa Hpyen hpung ni rai nga ai, SSPP ni mung dai shiga na ai hte kalang dat mawdaw masum hte hkan shachyut sa wa nna byin ai amu mang hkang rai nga ai. mani gaw a tsawm sha pri nem ai hku na shangut la lu sai nga ai,”
Nam-um mare a Sinna maga Nammwi hka hta ndai lapran, SSPP dingdung Sam rawt malan wuhpung ni, KIO Uphkang dap ni de hpa shiga n shana ai, kam mara Ja htu sha shang wa ai majaw, June praw 9 ya, jahpawt gaw, Nam-um mare GMH ni Ja htu nga ai masha marai 3 hpe sa woi let jahkrup hparan na matu sa shaga woi mat ai lam nga ai hpe chye lu ai.
Dai shiga na ai the SSPP hpyen hpung ni kalang dat hpyen n gun mawdaw 3 ram hte hkan nang wa nna, Nam-um mare KIA magam dap ni hte ga law hkat, shawngshai hkat wa ai masa re lam tsun ai re.
Dai majaw, mani hpawt sha ndai manghkang hpe ninghtawn rung de shalai nna, KIA maga mung, woi da ai SSPP a masha marai 3 hpe bai dat ya let, wuhpung lahkawng lapran pri nem sai lam chye lu ai. matut nna, Nam-Um mare Nammwi hka hta SSPP ni ja matut htu na lam nga nnga the seng nna, bawngban ai lam gaw atsawm n chye shi ai lam ginra masha ni tsun ai re.
Namhpakka makau, Nam – Um mare gaw Wunpawng mungdan shanglawt hpung KIO a uphkang sai ru kata kaw re ai zawn, maga mi hta Kokang MNDAA mung mare kaba uphkang bungli ni galaw nga ai re. ndai ginra hta laknak hpai wuhpung ni lapran, ginra masha ni mung nga yak ai masa ni byin hkrum nga ai re.
