Wunpawng Mungdan Shanglawt Hpyendap KIA Dapba (11) npu, Dung (12) Shwegu Ginra de Myen hpyen mawdaw du shang ai hpang, Shwegu Muklum kata nga Mung Shawa ni hprawng yen na matu hte, lam pat ai lam hpe KIA maga ndau wa ai re.
Dai ni June 8 ya shani n htoi hte lawng lam lahkawng hpe n dau da ai lam chye lu ai.
Dai n dau laika hta Shwegu Ginwang, Shwegu Muklum mare numshang lam kaba hte, Nga-Oo – Shwegu lam kaba hpe dai ni kaw na n htoi masat pat kau sai lam tsun ndau da ai re.
Myen Hpyen dap n dai laman Shwegu maga de hpyen n-gun kaba htu shadut htim gasat wa ai hpe KIA hte PDF dap ni lam lapran laja lana hkap shingla gasat ai rai tim, Hpyen laknak n-gun n bung ai majaw, shara n kau tat sum kau ra mat ai lam, shawng lam PDF magam gun ni tsun ai re.
Myen Hpyen maga Nbungli gap garum la ai sha n ga, Helicopter nbungli hte shim lam la nna, Shwegu dap kata de du hkra htaw shalai bang wa ai re nga, shawng lam hpyen magam gun hte ni nawn ai ni tsun ai re.
Dai Myen Hpyen Mawdaw hpung ni gaw, Shwegu de June praw 6 ya shani du shang wa ai lam chye lu ai.
Myen Hpyen Shiga lawk ni hta gaw, Mungdan asuya masing the buga gaw sharawt magam lam ni, hte dum n ta gaw gap ai lam, Asuya rung hkan lang na arung arai, tsi mawan hte ningpawt ninghpang malu masha ni hpe htaw shadu ya lu wa ai majaw, ginra masha ni kabu myit dik nga ma ai lam, Myen Hpyen Shiga ni hta tsun da ai re.
