Manmaw Majan shata lahkawng ram zim mat ai hpang, ndai May shata praw 2 ya shani kaw na majan laja lana bai gap gasat hkat taw nga ai lam, shawng lam hpyen magam gun ni kaw na chye lu ai.
May praw 2 ya shani kaw na bai byin ai majan hta Myen hpyen dap maga sum machyi law ai hte Ts K Hk kata bai hprawng shang ma ai lam, shawng lam hpyen magam gun langai KNG de n dai zawn tsun dan ai re.
“Manmaw masa gaw zim ai i, nga yang n zim ai, dai hku laknak kaba drone ni hte gaw kanoi shani shagu ngu na gap bun hkat taw ai rai nga ai, Ya n dai laman Myen ni bai pru wa ai majaw, anhte daphpawm maga na ni nut jaw dat ai kaw, ram ram machyi mat sam ma ai, shan hte dap kata de bai hprawng shang mat ma ai,” nga tsun ai re.
Myen hpyen dap maga, Manmaw hpyen-man shawng lam de Jet Nbungli n sa ai ram ram na sai hpe matut chye lu ai.
Jet Nbungli n sa ai rai tim, Y12 nbungli hte gaw hpyen n-gun arung arai shani shagu sa jahkrat ma ai lam matut tsun dan ai re.
Manmaw majan hta man pa gap gasat hkat ai lam n byin ai na sai rai tim, laknak kaba Drone the gap gasat hkat ai lam gaw, shani shagu nga ai lam, shawng lam hpyen magam gun ni kaw na chye lu ai.
Myen hpyen dap maga na gaw, Manmaw hpe n tat sum kau hkra Mali hka lam mayan na PDF dap shara ni yawng hpe htim gasat ai lam galaw nga ai re.
Ndai lanam rai n shang ai ten, Malihka lam hpe Myen ni up madu kau nna, Manmaw hpe n tat sum kau hkra ladat hpan hkum shaw shakut nga ai masa re lam, Hpyen masa yu maram ai ni tsun da ai re.
