KIA pat hkum da ai, Hpakant lam kaw, Myen Hpyen ahkang hte lai hkawm ai mung shawa Mawdaw Sengke gap hkrum ai lam byin wa ai nga, Hpakant ginra masha ni tsun ai re.
Mani May 13 ya shani Hpakant lam, Namya the Namting lapran kaw lai hkawm ai mung shawa mawdaw 2 the Sengke Kerry lahkawng hpe gap galau da ai mu ai lam ginra masha wa n dai zawn tsun dan ai re.
“Mani Namya hte Namting lapran kaw gap ai gaw teng ai, dai sumla kaw yu yang, Mung shawa si hkala ai mung lawm nga ai, hkum lai nga kaw lai ai majaw, gap hkrum ai rai nga ai,” nga tsun dan ai re.
Ya ten Hpakant lam yawng ngu na ram hpe Myen ni up madu da ai rai nna, Shanglawt Hpung ni maga na gaw, kalang marang sha lam de pru na sa hkap ai nga, matut tsun dan ai re.
Myen ni law malawng uphkang tawn ai lam re majaw, Myen hpyen ni ahkang jaw na lai shangun taw ai masa re lam n dai zawn matut tsun dan da ai re.
“Hpakant lam gaw, Myen ni hkrai she gate dung ai re rai, anhte bu ni gaw kalang marang sha she lam de pru na sa hkap re majaw, Myen ni lai mu hpa n ra ai nga na lai shangun ai rai nga ai, Myen ni gaw ya Lawnghkang Bawmyam Dap shara, Namting, Namya mare ni hkan Myen Hpyen ni she nga ai gaw,” nga tsun dan ai re.
Ya gap galau da ai shara gaw, Namya the Namting lapran kaw rai nna, gara mayan re ngu hpe a tsawm tup hkrak n chye lu ai re.
Gap galau da ai hta, gunrai htaw Tung Fung Mawdaw langai AD Van Mawdaw langai, Sengke lahkawng hpe gap galau da ai lam mu lu ai rai tim, Masha gade daram gara hku Si hkala ai ngu hpe a tsawm tup hkrak n chye lu shi ai re.
Hpakant Kamaing lam kaba hpe Wunpawng Mungdan Shanglawt Hpyendap Dung (6) the Dung (44) ni kaw na, aten n masat lam pat ai hpe, April 21 ya shani ndau da ai re.
