Hpakant Lawnghkang Grupyin kaw Myen Hpyen Nbungli Bawm Laja Lana Wa Jahkrat Bun Nga
Hpakant Lawnghkang Makau Grup yin kaw, dai hpawt daw laman hta sha Myen Hpyen Jet Nbungli hte Bawm masum lang wa jahkrat bun mat ai lam ginra masha ni kaw na chye lu ai.
Dai hpawt Manap hkying 10: 05 Am aten kalang, 12:08 hta kalang, Hkying 1 ram hta kalang wa jahkrat bun da ai nga ginra masha langai KNG shiga de ndai zawn tsun dan wa ai re.
“Dai hpawt laman hta sha 3 lang rai sai, ja ji wa gap bun ai, Sau Seng langai mung wan hkru taw nga ai, n kau Company wang shara ni kaw wa hkrat ai, ya majan naw byin taw ai re nga yang gaw, shinggan de gadai n gwi hkawm na a tsawm tup hkrak gaw rai n chye shi ai,” nga tsun dan ai re.
Dai hpawt daw hkying 10 ram hta wa jahkrat ai gaw, Mawsiza Hpara Kawng Thar Yar Kung, Marau Mare grup yin ni de wa jahkrat kau da ai lam chye lu ai.
Marau Mare grup yin de wa jahkrat ai lang မြန်မာစည်သူ ကုမ္ပဏီ wang na Back Hold langai hten mat nna, Company magam gun langai hkala hkrum wa ai lam chye lu ai.
Shani ka-ang hkying 12 aten bai wa jahkrat bun ai gaw, Lawnghkang hte Kate Maw lapran Goft Pa shingdu na Sin Hpyu Daw sau seng kaw wa hkrat ai lam chye lu ai.
Sau seng kaw nbungli bawm wa hkrat ai majaw, Sau Seng laja lana wan hkru nga ai hpe Social media n tsa hta mu lu nga ai re.
Shana naga de hkying 1 kaw bai wa jahkrat ai gaw, Mawsiza hte Kate lam numbraw kaw wa hkrat ai sha n ga, Mung Shawa gat seng dum n ta hkan wa hkrat ai lam nga ai hpe chye lu ai.
Myen Hpyen dap maga Hpakant de nbungli bawm laja lana bai wa jahkrat bun ai gaw, dai ni sawng dik masa lam re nga ginra masha ni tsun da ai re.
Sinat mahku n sen ni naw matut ngoi nga ai majaw, Mung Shawa si hkala ai lam hte, dum n ta hkra hten ai lam ni hpe a tsawm tup hkrak rai n chye lu shi ai re.
Ndai May Shata praw kaw na, Lawnghkang Goft Pa, Tsirung Kawng, Lupwa kawng grup yin ni hta Myen Hpyen dap hte KIA PDF pawng hpawm ni gasat hkat taw ai n htoi bat mi ram du wa sai re.
Myen Hpyen ni gaw, Lawnghkang kaw, Dap shara langai galaw na matu hkyen taw ai lam nga ai hpe ginra masha ni kaw na chye lu ai re.
