PDF Pawng Hpawm Ni Gasat Zing Da Ai Jinghpaw Mung Numshang Indaw Naba De Myen Ni Bai Gasat Du Shang Wa
Jinghpaw Mung hte Sagaing Jarit, Indaw Naba a lam Numbraw du hkra htim gasat shang wa lu ai hpang, Indaw Muklum hpe Nbungli hte laja lana wa gap bun taw ai nga, Shawng lam hpyen magam gun ni tsun ai re.
Myen Hpyen ni April 29 ya shana maga, Indaw Naba Lam numbraw du ai hpang, dai hpawt manap kaw na Indaw muklum makau grup yin shara shagu de nbungli bawm jahkrat bun taw ai lam, dai ginra na rawt malan magam gun langai KNG de ndai zawn tsun dan wa ai re.
“Katha kaw hpyen n gun wa mahkawng na, Indaw de April 21 ya shani kaw na htim gasat wa ai mana de hkying 3 ram kaw, Indaw Naba lam numbraw kaw du sai da, dai hpawt kaw na gaw, Indaw Byuha kawng makau grup yin de nbungli bawm laja lana jahkrat bun hpang taw sai,” nga tsun ai re.
Katha Hk.M.Y 309 dap kaw hpyen n-gun wa mahkawng na Indaw Naba maga de April 21 ya shani kaw na, htu shadut htim gasat wa ai gaw, n htoi 9 ya na ai hpang, Indaw Naba lam numbraw de du wa lu ai lam rai nga ai.
Katha hte Indaw Deng 18 tsang ai rai nna, Sengke hte hkawm yang Minute 45 tsan ai shara re lam chye lu ai.
Dai shara hpe Myen hpyen hpung ni n htoi 9 ya na hkra htim gasat ngut ai hpang, Indaw Naba lam numbraw de du wa lu ai rai nga ai.
Ya Myen Hpyen ni du nga ai shara gaw, Indaw muklum hte Deng 7 daram sha tsan sai shara re lam chye lu ai.
Myen Hpyen maga Indaw hpe Nbungli bawm laja lana jahkrat bun nga ai majaw, Indaw muklum hpe mung n dai laman tat sum kau na masa nga ai lam hpyen masa yu maram ai ni tsun da ai re.
Indaw de htim gasat sa wa ai Myen Hpyen hpung ni hpe PDF pawng hpawm dap ni, lam lapran hpyen n gun kaba hte ninghkap shingla gasat ai rai tim, Laknak madang tsaw ai lam n bung ai majaw, yen kau ya ra mat ai masa re nga, shawng lam hpyen magam gun ni tsun ai re.
Lam lapran rawt malan hpung maga na hkap shingla gasat ai majaw, Myen Hpyen maga na si hkala lam ni nga ai hpe mung matut chye lu ai re.
Indaw Naba ginra gaw, Jinghpaw mung de shang ai ahkyak ai chyinghka kaba langai re zawn, Hpyen masa hta mung grai ahkyak ai shara langai re lam chye lu ai.
Myen hpyen ni, hpyen n gun kaba hte bai htu gasat wa ai majaw, Indaw Naba ginra na mung shawa ni kalang bai hprawng yen ra taw ra sai re.
