Myen Hpyen ni shata masum jan htim gasat taw nga ai, Hpakant Mashi Kahtawng Buga Hpung a Kyuhpyi Bum shara hpe April 13 ya shana KIA PDF pawng hpawm dap maga tat sum kau da sai lam KIA hte ni nawn ai ni kaw na chye lu ai re.
Myen ni Mashi Kahtawng Kyuhpyi Bum hpe 2026 Shaning Ningnan kaw na Laknak kaba, Drone, hte shani shana gap gasat nga ai kaw na, April 9 ya shani Min Zay Thant woi awn ai Pyithutsit hpung ni du ai hpang, Mashi Kahtawng Kyuhpyi Bum hpe bai htim gasat wa ai gaw, April 13 ya shana tat kau ai lam re nga, dai ginra na KIA hte ni nawn ai Salang langai KNG Shiga de n dai zawn tsun dan wa ai re.
“2026 shaning galai ai kaw na, Mashi Kahtawng Kyuhpyi Bum hpe Myen ni htim gasat ai lam hpang wa ai re. rai tim March shata kaw gaw shata mi tup ngu na ram gaw majan zim mat ai, April 11 ya shani kaw na Kalang bai dabat htim gasat wa ai gaw April 13 ya shana hkying 10 chyen ram kaw tat sum kau ai,” nga tsun salang dan ai re.
Hpakant ginra hta April praw kaw na KIA PDF Pawng hpawm ni Myen Hpyen dap shara la nga ai Mawwan Kaba, Sutbum mare maga de bai htim gasat ai hta, awng dang ai lam lu la wa ai rai tim, Min Zay Thant Woi awn ai Warazup Pyithutsit hpung ni bai du ai hpang, lu da sai shara ni hpe tat sum kau ra mat ai sha n ga, Mashi Kahtawng Kyuhpyi Bum hpe mung tat sum kau ra mat ai re lam, ginra masha wa ndai zawn matut tsun dan da ai re.
April praw 6 ya shani kaw na Min Zay Thant woi awn ai Warazup Pyithutsit hpung ni Hpakant de hpyen n-gun garum lung wa ai gaw, April 9 ya shani Dapnu kawng de du shatup mat ai. April 11 ya shani kaw na Mashi Kahtawng Kyuhpyi bum maga de hpyen man bai kayin wa ai dai hpang kaw na laja lana gasat hkat ai gaw, n’htoi 3 ya ram nga hte tat kau ra mat sai gaw,” nga tsun dan ai re.
April praw kaw na, KIA PDF pawng hpawm dap maga na Sut Bum, Mawmau Bum maga de htim gasat zing madu kau lu wa ai hpang, Hpakant Tatma kawng hpe Drone, Laknak kaba, Sucide Drone, Shork Taik Done hpan hkum hte sa gap bun ai hta, Myen hpyen maga na mung sum machyi law wa ai lam matut chye lu ai re.
Myen hpyen dap hte Pyithutsit hpung ni Mashi Kahtawng Kyuhpyi bum hpe htim gasat ai ten, Pyithutsit hpyen hpung ni hpe shawng de law law si hkam shangun nna, htim gasat lung wa ai re lam chye lu ai.
Dai majan hta, Wara Zup Pyithutsit, Zahkung Ting Ying Woi awn ai Pyithutsit, Sam Hkyeng Pyithutsit ni shang lawm nna, htim gasat ai re hpe chye lu ai.
Ya ten Myen Hpyen dap ni Kyuhpyi Bum lagaw grupyin jut shara shagu ni hta shara la da na nga taw lam chye lu ai.
Myen Hpyen Dap hte Pyithutsit hpung ni Mashi Kahtawng Kyuhpyi bum pawt mayan na Mung Shawa dum n ta hkan na arung arai ni yawng hpe mung bai lagu shaw la taw sai nga ginra amyu shayi langai ndai zawn tsun dan da ai re.
“Min Zay Thant Pyithutsit the Myen Hpyen Hpung ni wa, Mashi Kahtawng hte Ye Aye Jaung hkan na rai ni yawng ma mat ai majaw, စနေ Jawng makau AIDS kawng grup yin hku hku gadai hpe nshang shangun mat sai, dai makau hkan yawng Myen ni nga taw na Mung Shawa gadai hpe mung n shang shangun sai, rai ni yawng hpai la taw nga ma ai, shan hte hpai la na she Gate kaw mahkawng da rai na, သုံးဘီး ni hte htaw la taw nga ma ai, dai shan the shang ai n ta hkan na rai ni hpa mung n nga sai,” nga tsun dan ai re.
Mani kaw na gaw, Sengtawng sa wa lam, Si Pin Kwik Thit Shara hkan na mung shawa ni hpe yen na matu KIA kaw na sadi jaw da ai lam, ginra mung shawa ni matut tsun dan ai kaw na chye lu ai re.
Ya ten Hpakant ginra hta hpyen masa matut shaja hkat taw nga ai rai tim, n dai Hkajaw poi ten laman, sinat mahku n sen ni gan zim taw ai lam chye lu ai.
Mashi Kahtawng Kyuhpyi bum hpe htim gasat zing madu kau ngut ai hpang, Sengtawng maga de bai htim gasat wa na masa nga ai majaw, Sengtawng mare masha ni myit tsang taw nga ma ai re.
